गौतमलाई भेट्न भैंसेपाटी पुगे बादल

७ पुष, काठमाडौं । नेकपाको विवादमा कतै नखुलेका उपाध्यक्ष बामदेव गौतम र गृहमन्त्री रामबहादुर थापा ‘बादल’ अब निरपेक्ष भएर बस्ने अवस्थामा छैनन् ।  नेकपाका दुई अध्यक्षले अलग अलग केन्द्रीय कमिटी बैठक गरिसकेपछि पार्टी औपचारिक रुपमै विभाजित भइसकेको छ ।

बबरमहलस्थित कार्की बैंकटमा भएको पुष्पकमल दाहाल प्रचण्ड– नेता माधवकुमार नेपाल पक्षीय केन्द्रीय कमिटीले प्रधानमन्त्री केपी ओलीलाई कारबाही गरी नेपाललाई रिक्त अध्यक्षमा मनोनयन गरेको छ ।  त्यसैले अब कतै नखुली बस्ने अवस्थामा कोही रहने कुरा आएन ।

साथै, गौतम र बादलमाथि अब खुलेर आउन चर्काे दबाब परेको छ । त्यसैले अब कतै न कतै त खुल्नैपर्छ भन्दै बादल सकृय भएका छन् । यसबारे छलफल गर्न बादल अहिले भैंसेपाटीस्थित गौतम निवास पुगेका छन् ।

दुबै नेताबीच एकैखाले सहमति गर्ने उद्येश्यले बादल गौतमलाई भेट्न गएको निकट स्रोतको दाबी छ ।  सम्भवतः गौतम र बादल एकैथलोमा रहनेछन् । दुबैको रुची ओली भएपनि निकटवर्तीहरुको चर्काे दबाबका कारण प्रचण्ड– नेपाल पक्षमा खुल्ने सम्भावना रहेको दाबी गरिएको छ ।