नेकपा फुटेपछि बाग्मति प्रदेशका मुख्यमन्त्रीको पद धरापमा

८ पुष, हेटौंडा । केन्द्रमा नेकपा फुटेपछि बागमति प्रदेशका मुख्यमन्त्री डोरमणि पौडेलको पद धरापमा परेको छ । बागमतीमा प्रदेश सभाको बैठक गत साउन ८ गतेदेखि बस्न नसकेपनि मुख्यमन्त्री पौडेलविरुद्ध अविश्वासको प्रस्ताव दर्ता हुने जोखिम बढेको हो ।

बागमती प्रदेशका एक मन्त्रीका अनुसार आन्तरिक विवाद कायमै रहेका कारण मुख्यमन्त्री पौडेललाई आफ्नै पार्टीभित्रबाट अविश्वासको प्रस्ताव आउने डर बढेको हो । यससँगै प्रदेश सरकारको अंक गणित सुरु भइसकेको छ । बागमती प्रदेशसभा ११० सदस्यीय छ । सरकार सन्चालनका लागि ५६ सिट चाहिन्छ । नेकपाका सांसद मात्रै ८० जना छन् । तीमध्ये प्रचण्ड–माधव नेपाल पक्षीय सांसदको संख्या ४६ छ । केपी शर्मा ओली निकट सांसद ३४ जना छन् । कांग्रेस २२, विवेकशील साझा ३ र अन्य ५ जना सांसद बागमती प्रदेशमा छन् ।

प्रचण्ड–माधव नेपाल पक्षका सांसदले साथ नदिने अवस्थामा मुख्यमन्त्री पौडेलले कांग्रेस र अन्य साना दलको साथ लिनुपर्छ । तर अहिलेसम्मको स्थितिमा पौडेललाई ओली निकट सांसदबाहेक अरुको समर्थन छैन । यसको अर्थ स्पष्ट छ– बागमती प्रदेशका मुख्यमन्त्री पौडेल आफ्नै संसदीय दलभित्र अल्पमतमा छन् ।

ओली निकट मानिने पूर्वमन्त्री केशव स्थापितसमेत मुख्यमन्त्री पौडेलसँग चिढिएका छन् । नेकपाका नेताहरु स्थापितले पौडेललाई साथ नदिने दाबी गर्छन् । नेकपाका प्रभावशाली मानिने नेताहरु स्थायी कमिटी सदस्य अष्टलक्ष्मी शाक्य, केन्द्रीय सदस्यहरु राजेन्द्र पाण्डे, पशुपति चौलागाईं लगायत पनि मुख्यमन्त्री डोरमणि पौडेलको विपक्षमा देखिन्छन् । यसकारण पनि ओलीका खास मान्छे भनिएका पौडेल अल्पमतमा परेका कारण पनि अविश्वासको मत बढेको हो ।