संसद विघटनविरुद्धका रिटमाथि सुनुवाई शुरु

८ पुस, काठमाडौं । संसद विघटनविरुद्ध सर्वोच्च अदालतमा परेका रिटहरुको सुनुवाइ आजदेखि शुरु हुदैछ । प्रधानमन्त्री केपी शर्मा ओलीले पुस ५ गते प्रतिनिधिसभा भंग गरी आगामी बैशाख २७ र २७ गते मध्यावधि निर्वाचन घोषणा गरेको सिफारिस राष्ट्रपति विद्यादेवी भण्डारीले सदर गरेपछि सोका विरुद्ध परेको रिटमाथि आजदेखि सुनुवाई हुन लागेको हो ।

संसद विघटन असंवैधानिक भएको दाबीसहित राष्ट्रपति र प्रधानमन्त्रीसमेतलाई विपक्षी बनाइ सर्वोच्चमा १३ वटा रिट निवेदन दायर भएका छन् । ११ वटा रिटको पेशी आजलाई र संवैधानिक इजलासमा पठाइएको एउटा रिटको पेशी आगामी शुक्रबारलाई तोकिएको छ । रिट दायर गर्नेहरुमा वरिष्ठ अधिवक्ता दिनेश त्रिपाठी, कन्चनकृष्ण न्यौपाने, लोकेन्द्रबहादुर ओलीलगायत छन् ।

यसैगरी यही पुस ७ गते नेपाल कम्युनिस्ट पार्टी नेकपाका सांसदहरु देव गुरुङ, कृष्णभक्त पोखरेल, शशी श्रेष्ठ र रामकुमारी झाँक्रीले पनि संसद विघटनविरुद्ध मंगलबार सर्वोच्चमा रिट दायर गरेका थिए ।

संसद विघटनसँगै नेकपा फुटेपछि त्यसको असर पार्टीमा परेको छ । तर संसद विघटनविरुद्ध स्वयंम सत्तारुढ नेकपाकै सांसद उभिएपछि ओलीलाई ठूलो समस्या सिर्जना भएको छ ।