नेकपाको संसदीय दलको नेतामा प्रचण्ड चयन

८ पुष, काठमाडौं । सत्तारुढ नेकपाको संसदीय दलको नेतामा पुष्पकमल दाहाल ‘प्रचण्ड’ चयन भएका छन् । नयाँ बानेश्वरस्थित संसद भवन परिसरको ल्होत्से हलमा बुधबार बसेको सांसदहरुको बैठकमा अध्यक्ष माधवकुमार नेपालले अर्का अध्यक्ष प्रचण्डलाई संसदीय दलको नेता बनाउने प्रस्ताव गरेका थिए । जसलाई हलमा उपस्थित सांसदहरुले सर्वसम्मतले अनुमोदन गरेपछि उनी दलको नेता बनेका हुन् ।

प्रचण्ड–माधव समूहले संसद सचिवालयमा दर्ता गरेको अविश्वासको प्रस्तावमा पनि प्रचण्डलाई नै प्रधानमन्त्री प्रस्ताव गरिएको थियो । बैठकमा नेकपा संसदीय दलका प्रमुख सचेतक देव गुरुङले प्रधानमन्त्री केपी शर्मा ओली विरुद्धको अविश्वास प्रस्ताव अनुमोदनका लागि पेश गरेका छन् ।

यसअघि प्रचण्ड–माधव समूहको केन्द्रीय कमिटी बैठकले केपी शर्मा ओलीलाई अध्यक्ष पदबाट हटाउनुका साथै माधवकुमार नेपाललाई नयाँ अध्यक्षमा चयन गरेको छ । यसले अब वैधानिक रुपमै ओलीलाई प्रधानमन्त्रीका रुपमा नैतिक रुपमा संकट उत्पन्न भएको छ ।

यद्यपl संसद विघटन भएर निर्वाचन आयोगले कुन पक्ष वैधानिक भन्ने छिनोफानो गरि नसकेकाले यसको टुंगो लाग्न बाँकी छ ।