ओली सरकारविरुद्ध आन्दोलनको आँधीवेहरी ल्याउनुपर्छ – नेता धनराज गुरुङ

९ पुष, काठमाडौं । नेपाली कांग्रेसका केन्द्रीय सदस्य धनराज गुरुङले वर्तमान सरकारविरुद्ध आन्दोलनको आँधी ल्याउनुपर्ने बताएका छन् । जनताको पसिना र बलिदानबाट ल्याएको संघीयता र गणतन्त्रमा पनि संसद विघटन गर्ने प्रधानमन्त्री केपी शर्मा ओलीविरुद्ध आन्दोलनको आँधी ल्याउनुपर्ने नेता गुरुङको भनाई छ ।

साथै उनले सरकारविरुद्ध कांग्रेसले तत्कालै आन्दोलन थाल्नुपर्ने पनि बताएका छन् । ‘विधिको शासन नै लोकतन्त्र हो’ पूर्व सांसद समेत रहेका नेता गुरुङले सामाजिक सञ्जाल फेसबुकमा लेखेका छन्, ‘हामी लोकतन्त्रवादीहरुले असंवैधानिक कदमको बिरुद्ध सशक्त आन्दोलनको आँधीवेहरी उठाउनुपर्छ ।’

यस्तो बेला पनि आन्दोलन नगरेर मौन बस्नु लोकतन्त्र बिरुद्धको षडयन्त्रको साक्षी बस्नु जस्तै भएको उनको टिप्पणी छ । उनले अगाडी लेखेका छन्, ‘यस्तो बेला पनि लोकतन्त्र बिरुद्धको षडयन्त्रको साक्षी बस्न हतार हुन्छ भने हामी सक्कली लोकतन्त्रवादी हुन सक्दैनौं।’

कांग्रेसमा वरिष्ठ नेता रामचन्द्र पौडेल पक्षका नेता गुरुङले सभापति शेरबहादुर देउवाले आन्दोलनका लागि तत्परता नदेखाएकोप्रति असन्तुष्टि व्यक्त गरेका छन् ।