मन्त्रिपरिषद पुनर्गठनको तयारी

९ पुष, काठमाडौं । “कसलाई के धन्धा घरज्वाईलाई भने खानकै धन्धा” भनेजस्तो प्रधानमन्त्री केपी ओली चरम राजनीतिक संकटमा फस्दासमेत पहिलो प्राथमिकता मन्त्रिपरिषद विस्तारमा लागेका छन् ।

आफूले रोजेको व्यक्तिलाई मन्त्री बनाउन नपाएको झाेंकमा संसद नै विघटन गर्न पुगेका ओलीलाई अब भने हाईसञ्चो भएको छ । किनभने संसद विघटनको विपक्षमा रहेका सातजना असन्तुष्ट मन्त्रीले राजीनामा दिएपछि ओलीका लागि आफूखुशी पुनर्गठन गर्न सहज भएको हाे ।

ओलीको गैरसंवैधानिक कदमविरुद्ध सारा राष्ट्र एकतावद्ध भएको अहिलेको विषम परिस्थितिमा राजनीतिक रुपमा शक्ति सञ्चय गर्न उनले मन्त्रिपरिषद पुनर्गठनलाई पहिलो कदमका रुपमा लिएका छन् ।

स्रोत भन्छ– आजै साँझसम्म पुनर्गठन भइसक्ने छ । नयाँ मन्त्री थपिने मात्र होइन, केही मन्त्रीको जिम्मेवारीसमेत हेरफेर हुन सक्ने सम्भावना रहेको छ ।

अहिले हुने पुनर्गठनमा पूर्व माओवादी नेता टोपबहादुर रायमाझीले रोजेको मन्त्रालय पाउने भएका छन् । स्रोतका अनुसार उनी जलश्रोत तथा उर्जा मन्त्री बन्दैछन् । साथै, ओली निकट मानिने आधा दर्जन मन्त्री अबको पुनर्गठनमा थपिने भएका छन् ।

जसमा महेश बस्नेत, नवराज सिलवाल, विशाल भट्टराई, छविलाल विश्वकर्मा, प्रेम आले, खगराज अधिकारी, किसान श्रेष्ठ , गणेश ठगुन्ना , नारदमुनि राना, पदम गिरी लगायतको सम्भावना रहेकोछ ।