नेकपाको वैधानिक विवाद छिटो टुंग्याउन प्रचण्डको आग्रह

१० पुस, काठमाडौं । नेकपाका अध्यक्ष पुष्पकमल दाहाल ‘प्रचण्ड’ले सत्तारुढ पार्टीभित्रको विवाद टुंग्याउन निर्वाचन आयोगलाई आग्रह गरेका छन् । माइतीघर मण्डलाबाट र्‍यालीसहित निर्वाचन आयोग पुगेर प्रचण्डले संविधान र कानूनका आधारमा आधिकारिक नेकपा आफूहरु भएको दावी गर्दै विवाद टुंग्याउन प्रमुख निर्वाचन आयुक्त दिनेशप्रसाद थपलियालाई आग्रह गरेका हुन् ।

पार्टी दर्ता गर्दाको विधान, केन्द्रीय कमिटी संख्या र ती सदस्यहरुको विवरण आयोगमा भएको र त्यसैका आधारमा नेकपा र निर्वाचन चिह्न सूर्य आफूहरुको भएको प्रचण्डको भनाई छ । नेकपा विभाजन अगाडिका एक सय जनाले ११ सय बढी सदस्य संख्या पुर्‍याउँदैमा वैधानिकता नपाउने प्रचण्डले बताए ।

प्रमुख निर्वाचन आयुक्त दिनेश थपलियाले नेकपाको वैधानिकता विवाद निरुपण तोकिएको अवधिभन्दा अगाडि नै हुने दाबी गरेका छन् ।