काेराेनाका कारण थप ३ जनाकाे ज्यान गयाे, आज मात्रै पाँच सय संक्रमित

११ पुष, काठमाडौं । नेपालमा काेराेनाभाइरसकाे संक्रमणका कारण आज मात्रै देशभर पाँच सय संक्रमित थपिएका छन् । कुल पाँच हजार चार सय ३४ जनाको पीसीआर परीक्षण गर्दा २१३ जना महिला र २८७ जना पुरुष सहित ५ सय जनामा संक्रमण देखिएको स्वास्थ्य तथा जनसंख्या मन्त्रालयले जनाएको छ ।

आज नै ८४० जना कोरोना संक्रमणबाट मुक्त भएका छन् भने तीन जनाको संक्रमणबाट ज्यान गएको छ । यस्तै पछिल्लो चौविस घण्टामा काठमाडाैं उपत्यकामा २६७ जना कोरोना संक्रमित थपिएका छन् । थपिएका मध्ये ११७ जना महिला र १५० जना पुरुष रहेको मन्त्रालयले जनाएको छ ।

पछिल्लो अपडेट अनुसार शनिबार अपरान्हसम्म ६ हजार ७४९ जना आइसोलेसनमा छन् । मन्त्रालयले अहिलेसम्म २ लाख ५७ हजार ७ सय जनामा संक्रमित भएको र त्यसमध्ये २ लाख ४९ हजार १३२ जना संक्रमणमुक्त भइसकेको जनाएको छ । अहिलेसम्म कुल मृत्यु हुनेको संख्या भने १ हजार ८१९ रहेको छ । स्वास्थ्य मन्त्रालयको तथ्यांक अनुसार कुल १९ लाख ५ हजार ८२६ पीसीआर परीक्षण गरिएको छ ।