विश्वभर तीव्ररुपमा फैलिदै कोरोनाको नयाँ प्रकार

१२ पुष, काठमाडौं । केही दिन अघि बेलायतमा देखा परेको कोरोनाको नयाँ प्रकार ‘भेरियन्ट’ विश्वका अन्य मुलुकहरुमा पनि तीव्ररुपमा फैलिए गइरहेकाे बीबीसीले जनाएकाे छ । बीबीसीका अनुसार नयाँ प्रकारको भाइरस विभिन्न युरोपेली मुलुक, क्यानडा र जापानमा समेत देखिएको छ ।

बेलायतमा नयाँ प्रकारको भाइरस देखिएको भन्दै छिमेकी मुलुक भारतले बेलायतमा उडान बन्द गरेको छ ।नयाँ प्रकारको भाइरस देखिएपछि विभिन्न मुलुकहरुले कोभिड-९ विरुद्धको खोप लगाउने कार्यलाई तीव्रता दिइएको छ ।

तीव्र गतिमा संक्रमण फैलिने कोरोना भाइरसको रुपान्तरित नयाँ प्रकारको संक्रमण विश्वका विभिन्न देशमा पुगेको छ ।  बेलायतमा पहिलोपटक देखिएको सो भाइरसको संक्रमण अहिले युरोपका स्पेन, स्वीट्जरल्याण्ड, फ्रान्स, जर्मनी, इटाली, नेदरल्याण्डस र अस्ट्रेलियामा डेनमार्कसहितका देशमा देखिएको छ। ती देशहरुमा संक्रमण पुष्टि भएकाहरु हालै बेलायतबाट फर्किएका थिए ।

यस्तै क्यानडाको अनतारिओका दम्पतीमा पनि नयाँ स्वरुपको भाइरसको संक्रमण देखिएको हो । तर उनीहरुको ट्राभल हिस्ट्री भने नरहेको स्थानीय अधिकारीले बताएका छन् ।

जापानमा पनि सो भाइरसको संक्रमण देखिएपछि सोमबारदेखि गैरआवासीय विदेशीहरुलाई एक महिनाका लागि देश प्रवेशमा रोक लगाउने भएको छ । बेलायतबाट आएका पाँच यात्रुमा सो भाइरसको संक्रमण देखिएको थियो । युरोपका धेरै देशसँग क्यानडा र जापानमा पनि रुपान्तरित नयाँ प्रकारको कोरोना भाइरसको संक्रमण पुष्टि भएको हो ।