अब प्रमुख प्रतिपक्षी दलकै भरमा नेकपाका दुबै पक्ष

१२ पुष, काठमाडौं । सत्ताधारी नेपाल कम्युनिष्ट पार्टी दुई चिरा परेपछि विकसित घटनाक्रमले देशमा राजनीतिक दुर्घटना निम्त्याउने संकेत गरेको छ । संविधानमा हुँदै नभएको अधिकार प्रयोग गरी प्रधानमन्त्री केपी ओलीले प्रतिनिधिसभा विघटन गराएपछि मूलधारका राजनीतिक दलहरुमा ध्रुवीकरण चुलिएको छ ।

विघटन प्रकरणमा प्रमुख प्रतिपक्षी दल नेपाली कांग्रेस बीचको बाटोमा उभिएको छ भने अरु दलहरु लगभग एकैथलोमा पुगेको अवस्था छ । ओली नेतृत्वको नेकपाको वर्चश्व रहेका प्रदेश सरकारहरु पनि धर्मराउन थालेका छन् । प्रदेश नं. २ बाहेक अन्यत्र नेकपाकै सरकार रहेकाले ती सबैमा पार्टी विभाजनको छायाँ परेको छ । साथै, अब प्रमुख प्रतिपक्षी दलकै भरमा नेकपाका दुबै पक्ष परेका छन् ।

केन्द्रमा समेत नेपाली कांग्रेसले प्रष्ट नीति अख्तियार गरेको छैन । एकातिर ओलीको कदमलाई असंवैधानिक करार गरेको छ भने अर्कातिर निर्वाचनमार्फत सरकार बनाउने अभियानलाई समेत बल दिन खोजेको छ ।  जानकारहरु भन्छन्, यो सबै सभापति शेरबहादुर देउवाको सत्तामा पुग्ने चाला मात्रै हो । नत्र असंवैधानिक कदमको विरोधमा आन्दोलन नै गर्नुपथ्र्याे । यद्यपि पार्टीले भोलिका लागि देशैभरिका १६५ निर्वाचन क्षेत्रमा विरोध प्रदर्शन गर्ने निर्णय चाहिं गरिसकेको छ ।

प्रतिनिधिसभा विघटन सम्बन्धी सर्वाेच्च अदालतबाट आउने फैसलाका आधारमा दुई मध्ये एउटा नेकपासँग मिलेर सरकार बनाउने उनको दाउ देखिन्छ । देउवाको बुझाईमा अबको प्रधानमन्त्री उनै हुन् । किनभने ज्योतिषीले ७ पटक प्रधानमन्त्री बन्ने भविष्यवाणी जो गरेका छन् – ती नेताले ढट्टाको शैलीमा भने ।

पार्टी नेतृत्वको दोधारे नीतिले गर्दा जिल्ला जिल्लामा कार्यकर्ता भने अन्योलग्रस्त देखिएका छन् । कि त प्रष्टसँग आन्दोलनमा जानुपर्यो , या सत्ताको खेलमा अल्झनु पर्यो– यस्ता गुनासो गर्ने कार्यकर्ता धेरै छन् ।  प्रमुख प्रतिपक्षी दल भनेको वैकल्पिक सरकार हो तर अहिले उसको नीति भने अर्काको पिछलग्गु जस्तो देखियो भन्दै एक केन्द्रीय सदस्य भन्छन्– अहिले त कांग्रेस सत्ताबाट टाढै रहेको सन्देश जनतासमक्ष दिनेबेला हो । त्यसैले हामीले प्रष्ट रुपमा आन्दोलन गर्ने सन्देश दियौं भने मात्रै चुनावमा जान पनि सहज हुनेछ ।

अहिल्यै सत्ताका लागि च्याँखे थापेको जस्तो सन्देश जाने हो भने कांग्रेस फरि पनि प्रतिपक्षमै रहने हो भन्दै उनले कांग्रेस एक्लै आन्दोलनमा जान सक्नुपर्ने बताए । तर देउवाको सोच भने त्यस्तो देखिंदैन । प्रतिनिधिसभा विघटन सम्बन्धी सर्वाेच्च अदालतबाट आउने फैसलाका आधारमा दुई मध्ये एउटा नेकपासँग मिलेर सरकार बनाउने उनको दाउ देखिन्छ । देउवाको बुझाईमा अबको प्रधानमन्त्री उनै हुन् । किनभने ज्योतिषीले ७ पटक प्रधानमन्त्री बन्ने भविष्यवाणी जो गरेका छन् – ती नेताले ढट्टाको शैलीमा भने ।

देउवाको यो शैली र प्रवृत्तिले फेरि ०५९ साल नदोहरिएला भन्न सकिन्न । त्यतिखेर राजा ज्ञानेन्द्रको उक्साहटमा लागेर देउवाले पार्टी निर्णयको अवज्ञा गर्दै यस्तै परिवेशमा प्रतिनिधिसभा विघटन गराएका थिए । त्यसपछि देश अँध्यारो सुरुङमा फसेको इतिहास ताजै छ । उक्त घटनाबाट समेत देउवाले पाठ सिकेको देखिएन । अहिले उनी प्रष्ट रुपमा एउटा कित्तामा उभिनुपर्ने बेला हो । त्यसले मात्रै लोकतन्त्रलाई मजबूत बनाउन सक्छ । तर सत्ता स्वार्थ स्वार्थका लागि देउवा निरिह देखिएका छन् ।

सरकारले गल्ती गर्दा खबरदारी गर्ने मुख्य जिम्मेवारी प्रमुख प्रतिपक्षी दलको हो । किनभने उ वैकल्पिक सरकार पनि हो । तर देउवाले आफ्नो भूमिकाप्रति कहिल्यै न्याय गर्न सकेनन् । त्यसको प्रभाव आम कांग्रेसजनले भोग्नु परिरहेको छ । नेपाली कांग्रेस स्थापनादेखि नै लोकतन्त्र र संविधानवादको सर्वाच्चतालाई आधार बनाएर आएको हो । अहिले संविधानमाथि ठाडो प्रहार भएको छ ।

लोकतन्त्र क्षतविक्षत भएको छ । त्यसैले सबै मुद्धा थाँती राखेर अहिले केवल संविधान र लोकतन्त्रको रक्षा गर्न मात्रै भएपनि कांग्रेस सडकमा जानैपर्ने हो । पुस ५ गते ओलीले नेपालको संविधान , २०७२ माथि कू गरेका छन् । त्यसको विरोधमा तत्क्षण कांग्रेस सडकमा जानुपर्नेमा सभापति नै अलमलमा देखिएका छन् । यसले कांग्रेसलाई मात्र होइन समग्र प्रजातन्त्रलाई नै खतरामा पारेको छ ।

ओली भनेको सर्वसत्तावादी चरित्रको व्यक्ति भएको जगले अनुुभूति गरिसक्यो । उनी आफ्नो गुटको हितका लागि जस्तोसुकै अलोकतान्त्रिक कदम चाल्न नडराउने रहेछन् । त्यस्ता व्यक्तिका पछाडि लागेर कांग्रेस बस्ने हो भने ढिलो चाँडो यो देशमा फेरि निरंकुशताले टाउको उठाउने निश्चित छ । त्यसमा थोर बहुत अंश कांग्रेसजनलेसमेत लिनुपर्ने हुन्छ ।