विद्रोह गरेर भएपनि संसद पुनःस्थापना गर्ने घनश्याम भुसालको चेतावनी

१२ पुष, बुटवल । नेकपाका नेता तथा निवर्तमान कृषिमन्त्री घनश्याम भुसालले विद्रोह गरेर भएपनि प्रतिनिधिसभा पुनःस्थापना गर्ने बताएका छन् । प्रतिनिधिसभा विघटनको निर्णय संविधान, परम्परा र जनचाहना विपरित भएकाले सडकबाट विद्रोह गरेर भएपनि पुनःस्थापना गरिने मन्त्री भुषालको भनाई छ ।

पुष्पलाल मित्रता केन्द्र रुपन्देहीले आइतबार तिलोेत्तमामा गरेको पत्रकार भेटघाटमा नेता भुसालले विश्वका कुनै पनि सभ्य मुलुकमा जनताको चाहना विपरित गरिएको संसद विघटनलाई अदालतले सदर नगरेको दाबी गरे ।

प्रतिनिधिसभा पुनर्स्थापना नभए संविधानको उल्लंघन सुरु हुने र मुलुकमा अस्थिरता निम्तिने उनको धारणा छ । संसद विघटन गर्ने निर्णयले नेपाली जनताले ५० वर्षदेखि चाहेको समृद्धिको आकांक्षा तुहाएको र अस्थिरतालाई बल पुगेको उनले बताए ।

नेता भुसाल प्रचण्ड–माधव समूहले रुपन्देहीको तिलोत्तमामा गरेको जिल्ला भेलालाई सम्बोधन गर्न गृह जिल्ला आएका हुन् ।