चुनावी माहोल बनाउँदै राप्रपा अध्यक्ष थापा

१३ पुष, हेटौंडा । राष्ट्रिय प्रजातन्त्र पार्टी (राप्रपा) का अध्यक्ष कमल थापा आज चुनावी माहोल बनाउँछै छन् । उनी आज आफ्नो निर्वाचन क्षेत्रमा दिनभर कार्यकर्ता भेटघाटमा व्यस्त भए । आज मकवानपुर–१ को बागमती गाउँपालिकामा पुगि विभिन्न वडाका आयोजित अगुवा कार्यकर्ता भेलामा सरिक हुँदै थापाले सम्बोधन गरे ।

०६२/६३ को परिवर्तन पछि मुलुकले लिएको बाटो र मार्गचित्र त्रुटिपूर्ण भएको भन्दै थापाले त्यो मार्ग सच्याउन जरुरी भएको बताए । उनले अब कांग्रेस र कम्युनिष्टको विकल्प राप्रपा भएको दावी गरे । राईगाउँ र फापरबारिमा आयोजित छुट्टाछुट्टै कार्यक्रमलाई सम्बोधन गर्दै थापाले आफुले चुनाव के कारणले हारेको बुझ्न नसकेको समेत चर्चा गरे ।

आफूसङ्ग प्रतिस्पर्धा गर्ने भन्दा म मा के कुरा कम छ ? योग्यता, क्षमता, अनुभव भनी प्रश्न गर्दै थापाले आफुले मकवानपुरे जनताको थप माया खोजेको बताए । कांग्रेस कम्युनिष्टको असफलता र अकर्मण्यताको चर्चा गर्दै थापाले भ्रष्टाचार, बेरोजगारीको अन्त्य अहिलेको प्रमुख आबश्यकता भएको बिचार व्यक्त गरे ।

क्रान्ति र परिवर्तनको गफ दिने शक्तिहरु स्वार्थ, शक्ति र पदको भागवण्डामा रुमलिएर देशलाई बर्बाद गराउन उद्दत रहेको भन्दै थापाले आफुलाई ठुला भन्ने शक्ति कांग्रेस कम्युनिष्ट असफल भएको बताए । कार्यक्रममा बोल्दै पार्टीका कार्य सम्पादन समिति सदस्य राजाराम बर्तौलाले इमानदारीता, निष्ठा र सिद्धान्त प्रतिको प्रतिबद्धताकाको जगमा टेकेर राप्रपालाई मुलुकको बलियो र स्थायी शक्ति बनाउनु पर्ने आबश्यकतामा जोड दिए ।

भ्रष्ट र असक्षमलाई बिस्थापित गरि राप्रपालाई स्थापित गर्न उनको आग्रह थियो । कार्यक्रममा राप्रपा मकवानपुर अध्यक्ष रामहरी न्यौपाने,जिल्ला सचिव सागर थापा, दिल बहादुर बल, शरणकाजी श्रेष्ठ ,जोसेफ राई, मदन राना लगायतले बोलेका थिए । थापाले विभिन्न पार्टी परित्याग गरेकालाई राप्रपामा स्वागत गरेका थिए ।