आँगन स्वीट्समा प्रहरीको छापा, डीआईजीले मिठाई किन्दा नङ भेटियो

१४ पुष, काठमाडौं । कतै तपाईले खुशीयाली साट्न आँगन स्वीट्सको मिठाई त खानु भएको छैन् ? वा साथीभाई, ईष्टमित्रलाई मिठाई बाड्नु त भएको छैन् ? यदि छ भने होस् गर्नुस है ?

कहिले अखाध्य रंग त कहिले बासी मिठाई खुवाउँदै आएको चर्चित आँगन स्विट्सको मिठाइमा नङ भेटिएपछि प्रहरीले छापा मारेको छ ।आँगनको कमलपोखरीस्थित शाखाले बिक्री गरेको मिठाईमा नङ फेला परेपछि महानगरीय प्रहरी वृत मालिगाउँले छापा मारेको हो ।

नेपाल प्रहरीका एकजना एसएसपीले डीआईजीमा बढुवा सिफारिस भएको खुशीयालीमा आँगनबाट मिठाई किनेका थिए । सो मिठाई खोल्दा नङ भेटिएपछि उनले काठमाडौं प्रहरीलाई खबर गरे । डीआईजीमा बढुवा सिफारिस भएका डा. देवबहादुर बोहराले कमलपोखरीस्थित आँगनको शाखामा मंगलबार मिठाई किनेका थिए ।

अहिले महानगरीय प्रहरी वृत मालिगाउँका डीएसपी खुमलाल भुषालको टोली घटनास्थलमा पुगेको छ । खाद्य तथा गुण नियन्त्रण कार्यालयलाई आवश्यक कारबाही अघि बढाउन प्रहरीले जिम्मा लगाएको छ ।

खाद्य प्रविधि तथा गुण नियन्त्रण विभागले त्यसबारे अनुसन्धान शुरु गरेको छ । पसल सञ्चालकलाई नियन्त्रणमा लिने कि नलिने भन्ने निर्णय भने भईनसकेको विभागले जनाएको छ ।