मुख्यमन्त्री राईलाई काम नगर्न निर्देशन

१४ पुष, विराटनगर । सत्तारुढ नेकपाको प्रदेश १ संसदीय दलका उपनेताले मुख्यमन्त्री शेरधन राईलाई दलको नेताको हैसियतमा काम नगर्न निर्देशन दिएका छन् । मंगलबार लिखित पत्र पठाउँदै उपनेता टङ्क आङ्बुहाङले अविश्वासको प्रस्ताव परेकाले मुख्यमन्त्री राईलाई नेकपा संसदीय दलको नेताको हैसियतमा काम नगर्न निर्देशन दिएका हुन् ।

नेकपा विवाद बढेसँगै प्रचण्ड– माधव समूहले मुख्यमन्त्री राईविरुद्ध आइतबार अविश्वासको प्रस्ताव पेस गरेको थियो । सोमबार नेकपाका प्रमुख सचेतक बुद्धिकुमार राजभण्डारीले मुख्यमन्त्री विरुद्ध अविश्वासको प्रस्ताव पेस गर्ने सांसदलाई २४ घण्टे स्पष्टीकरण सोधेका थिए ।

स्पष्टीकरणमा प्रस्ताव फिर्ता लिएर २४ घण्टा भित्र स्पष्टीकरण पेस नगर कारवाही गर्ने चेतावनी दिइएको थियो । तर पत्र पठाएको २४ घण्टा नबित्दै मंगलबार बिहान उपनेता टङ्क आङ्बुहाङले दलका नेता राईलाई निर्देशनात्मक पत्र पठाउँदै दलको नेताको रुपमा काम नगर्न भनेका हुन् ।

ओली पक्षका मुख्यमन्त्री राईविरुद्ध नेकपाकै प्रचण्ड– माधव समूहका ३७ सांसदले अविश्वासको प्रस्ताव दर्ता गराएका थिए ।