शेखर कोइरालाका दाजु रञ्जनको दिल्लीमा निधन

१९ पुष, काठमाडौं । नेपाली कांग्रेसका प्रभावशाली नेता डा. शेखर कोइरालाका दाजु निरञ्जन कोइराला (निरु दा) को निधन भएको छ । भारतको नयाँ दिल्लीमा बसोबास गर्दै आएका निरञ्जन कोइरालाको १९ गते आइतबार बिहान ११ बजे ७५ वर्षको उमेरमा निधन भएको हो ।

उनी नयाँदिल्लीको क्याक्स अस्पतालमा एक महिनादेखि उपचाररत थिए । निधन भएका निरञ्जनको आइतबार ४ बजे नै नयाँ दिल्लीको निगमबोध घाटमा अन्तिम संस्कार गरिने भएकाे छ । रञ्जन कोरोना भाइरसबाट संक्रमित भएपछि अस्पताल भर्ना भएका थिए ।

पिता केशव कोइराला र आमा नोना कोइरालाका सुपुत्र निरञ्जन शेखरका दाजु हुन् । निरंकुश पञ्चायती शासनविरुद्ध प्रजातान्त्रिक आन्दोलनमा समेत लागेका निरञ्जन नेपालका पुराना र प्रतिष्ठित पर्यटन व्यवसायी पनि हुन् ।

निरञ्जन कोइराला तत्कालीन पर्यटनमन्त्री रामहरी जोशीको विज्ञ सल्लाहकार समेत थिए । पछिल्लो समय दिल्लीमा व्यवसाय गरिरहेका निरञ्जन बिरामी भएपछि अस्पताल भर्ना भएका थिए ।