ओलीको गुट छाडेर कर्णालीका मन्त्री प्रचण्ड-माधव खेमामा !

१९ पुष, सुर्खेत । सत्तारुढ नेकपा विभाजन भएपछि कर्णाली प्रदेशमा पनि नेताहरुले गुट परिवर्तन थालेका छन् । नेकपा प्रधानमन्त्री केपी शर्मा ओली समूहका कर्णाली प्रदेशका दुई मन्त्री नै प्रचण्ड माधव नेपाल समूहमा लागेका छन् ।

सरकारका सामाजिक विकास मन्त्री दल रावल, उद्योग पर्यटन वन तथा वातावरण मन्त्री नन्दसिंह बुढा र प्रदेश विधायन समितिका पूर्वअध्यक्ष पदमबहादुर रोकाय प्रचण्ड–नेपाल समूहमा लागेका हुन् ।

कर्णाली प्रदेशका अर्थमन्त्री प्रकाश ज्वालाका अनुसार रोकाया भने एक हप्ताअघि नै प्रचण्ड–नेपाल समूहमा प्रवेश गरिसकेका थिए । यससँगै कर्णाली प्रदेशसभामा नेकपाको ३३ सदस्यीय संसदीय दलमा ओली पक्षमा सभामुख राजबहादुर शाहीसहित ११ जना हुँदा प्रचण्ड–नेपाल समूहमा २२ जना पुगेका छन् ।

ओली समूहका तीनजना प्रचण्ड–नेपाल समूहमा लागेसँगै मुख्यमन्त्री शाहीको सरकार सुरक्षित भएको छ । अब कर्णाली प्रदेशमा ओली समूहले चाहेर पनि मुख्यमन्त्री महेन्द्र शाहीविरुद्ध अविश्वासको प्रस्ताव ल्याउन सक्ने छैन् ।