वर्तमान सरकार कामचलाउ हो : मन्त्री तुम्बाहाङ्फे

२० पुस, विराटनगर । भूमि व्यवस्था, सहकारी तथा गरिबी निवारण मन्त्री शिवमाया तुम्बाहाङ्फेले प्रतिनिधिसभा विघटन भएपछि वर्तमान सरकार कामचलाउ बनेको बताएकी छिन् ।

संसद विघटन संविधानमा स्पष्ट रुपमा उल्लेख नभएतापनि ताजा जनादेशमा जानका लागि प्रधानमन्त्री केपी शर्मा ओलीले संसद विघटनको निर्णय गरेको उनले बताइन् । मन्त्री तुम्बाहाङ्फेले तोकिएको मितिमा चुनाव गराउन सरकार लागिपरेको बताइन् ।

पत्रकारहरुसँगको कुराकानीमा मन्त्री तुम्बाहाङ्फेले ‘तोकिएको मितिमा चुनाव हुनेमा शङ्का नगर्न आग्रह गरेकी छिन् । चुनावका लागि आवश्यक सबै तयारी अगाडि बढेको उनले बताइन् ।

उनले ओली सरकार कामचलाउ भएको बताउँदै सरकारको काम कारवाही सहज रुपमा अघि बढाउनका लागि मात्रै प्रधानमन्त्रीले मन्त्रीमण्डल विस्तार गरेको बताइन् ।

यसैबीच प्रदेशसभा पनि विघटन हुनसक्ने चेतावनी दिएकी छिन् । आज विराटनगरमा आयोजित पत्रकार सम्मेलनमा उनले यस्तो बताएकी हुन् ।

पूर्व कानुनमन्त्री समेत रहेकी उनले केन्द्रमा देखिएको राजनीतिको प्रभाव प्रदेश सभामा पनि देखिएकाले नेपालको संविधान र प्रदेशको कानुन अनुसार प्रदेशसभा विघटन हुन सक्ने सम्भावना रहेको बताइन् । प्रदेशसभा सञ्चालन र विघटनको अधिकार प्रदेशमा रहेको उनको तर्क छ ।