ओली अश्लील गाली गलौजमा उत्रिए : योगेश भट्टराई

२० पुष, काठमाडौं । सत्तारुढ नेकपाका नेता योगेश भट्टराईले प्रधानमन्त्री केपी शर्मा ओलीका पछिल्ला अभिव्यक्ति अश्लील भएको टिप्पणी गरेका छन् । सोमबार चितवनको भरतपुरमा आयोजित अगुवा पार्टी कार्यकर्ता भेलालाई सम्बोधन गर्दै पूर्व पर्यटनमन्त्री समेत रहेका भट्टराईले प्रधानमन्त्री ओलीले अशिष्टता प्रदर्शन गर्न थालेको बताएका हुन् ।

आइतबार काठमाडौंमा भएको कार्यक्रममा प्रधानमन्त्री ओलीले प्रचण्ड–नेपाल पक्षका नेताहरुलाई लक्षित गर्दै जिउँदै नेताहरुलाई शहिद भन्दै श्रद्धाञ्जली दिन हुन्थ्यो भन्ने गैरजिम्मेवार अभिव्यक्ति दिएका थिए ।

प्रधानमन्त्री ओलीका पछिल्ला अभिव्यक्ति अशिष्ट गालीगलौजपूर्ण र अमानवीय रहेको भट्टराईको आरोप छ । अर्को प्रसंगमा उनले संविधानमा हुँदै नभएको व्यवस्थालाई आधार मानेर सरकारले संसद विघटन गरेको बताए । उनले सडक प्रदर्शनकै बलमा संसद पुनःस्थापना हुने पनि बताएका छन् ।