गठन भएन संवैधानिक इजलाश

२४ पुष, काठमाडौं । गएको पुष १ गते प्रधानमन्त्री केपी ओलीले जारी गराएको संवैधानिक परिषदसम्बन्धी अध्यादेशविरुद्ध सर्वाेच्च अदालतमा परेको रिट उपर आज सुनवाई भएन ।  परिषद अध्यक्षसमेत रहने प्रधानमन्त्री ओली र सदस्य प्रधानन्यायधीश चालेन्द्रसम्शेर राणा विपक्षी रहेको सो रिट उपर आज संवैधानिक इजलाश गठन गर्ने भनिएको थियो ।

आफैं विरुद्ध परेको रिटउपर सुनुवाई गर्न प्रधानन्यायधीश राणाले नैतिक र विधिशास्त्रीय दृष्टिले समेत अनुचित भन्दै चर्काे आलोचना भइरहेको थियो । त्यसैले धेरैले यो रिटमा प्रधानन्याधीशले कस्तो नीति अपनाउलान् भनेर प्रतीक्षा गरेका थिए । तर राणाले आज रिटको सुनुवाई गर्न इजलाश नै गठन गरेनन् ।

संविधानको व्याख्या गर्नुपर्ने जटिल कानूनी प्रश्न भएकाले उक्त रिटको सुनुवाई संवैधानिक इजलाशबाटै हुनुपर्ने अवस्थाछ । सर्वाेच्चले हप्ताको दुई दिन बुधबार र शुक्रबार मात्रै संवैधानिक इजलाशमा सुनुवाई गर्ने प्रचलन रहेकोछ । अधिवक्ता ओमप्रकाश अर्यालले अध्यादेश र सिफारिश भएकाहरुको नियुक्ति खारेजीको माग गर्दै रिट दायर गरेका थिए ।