पूर्वप्रधानन्याधीशलाई धम्क्याउने ओलीकाे कार्य आपत्तिजनक : प्रचण्ड–नेपाल

२६ पुष, काठमाडौं । पुष्पकमल दाहाल र माधवकुमार नेपाल नेतृत्वको नेकपाले चार पूर्वप्रधानन्याधीशहरुले संयुक्त वक्तव्य दिएकोमा प्रधानमन्त्री केपी ओलीले अपमानित गर्ने र धम्काउने काम गरेको भन्दै उक्त कार्य आपत्तिजनक भएको निष्कर्ष निकालेको छ । प्रचण्ड–नेपाल पक्षको सचिवालय बैठकले ओलीले अधिनायकवादी र निरंकुश चरित्र देखाएको भन्दै यस्तो कार्य तत्काल रोक्न चेतावनी दिएको हाे ।

आइतबार पार्टी केन्द्रीय कार्यालय पेरिसडाँडाँमा बसेको सचिवालय बैठकले  चारजना पूर्वप्रधानन्यायाधिशले प्रतिनिधिसभा विघटनको बारेमा संवैधानिक व्यवस्था के छ भन्ने सम्बन्धमा आफ्नो दृष्टिकोण सार्वजनिक गर्दा प्रधानमन्त्री ओलीले अपमानित र धम्क्याएको भन्दै बैठकले प्रतिवाद गरेकाे हाे ।

मुख्यत : चार जना प्रधानन्यायाधिशहरु मिनबहादुर रायमाझी, अनुपराज शर्मा, कल्याण श्रेष्ठ र सुशिला कार्कीले देश जनता लोकतन्त्र संविधान राजनीतिक स्थिरता र सुशासनप्रतिको निष्ठाका कारण एउटा जिम्मेवार नागरिकको हैसियतमा प्रतिनिधिसभा विघटनको बारेमा संवैधानिक व्यवस्था के छ भन्ने सम्बन्धमा आफ्नो दृष्टिकोण सार्वजनिक गर्दै सार्वजनिक वक्तव्य दिएकोमा उनीहरुलाई प्रधानमन्त्री ओलीले अपमानित गर्ने र धम्क्याउने  कार्य आपत्तिजनक भएकाे भन्दै बैठकले यसको प्रतिवाद गर्दै कडा शब्दमा र्भत्सना गरेको छ ।

यस्तै बैठकले सरकारी सञ्चार माध्यमहरु कुनै गुटको प्रचारक जस्तो काम गरेको भन्दै राज्यको स्रोत साधन दुरुपयोग गर्दै गुटलाई सेवा गर्ने काम बन्द गर्न माग समेत गरेको छ । बैठकले पार्टीको सम्पूर्ण निकायलाई पार्टीको सुदृढिरणमा लाग्न र संघर्षका कार्यक्रमलाई प्रभावकारी रुपमा सफल पार्न निर्देशन दिएको छ।