देशभरका ७४९ स्थानीय तहमा वाणिज्य बैंकको शाखा विस्तार, बाँकी ४ तहमा कहिले ?

२ माघ, काठमाडौं । ७५३ स्थानिय तहमध्ये ७४९ स्थानिय तहमा वाणिज्य बैंकले शाखा विस्तार गरेका छन् । पछिल्लो समय बैंकहरुले प्रतिस्पर्धी रुपमा बजार विस्तार गर्दै आएका छन्। नेपाल राष्ट्र बैंकले बैंक नपुगेका स्थानीय तहमा बैंकिङ पहुँच पुर्याउन निर्देशन दिएपछि बैंकहरुले शाखा स्थापना गरेर ती क्षेत्रमा बैंकिङ सुविधा पुर्याउन थालेका हुन्।

संघीय संरचना अनुसार बनाइएका ७ सय ५३ स्थानीय तहमध्ये हालसम्म ७४९ वटा स्थानीय तहमा वाणिज्य बैंकका शाखा स्थापना गरिसकेको राष्ट्र बैंकको पछिल्लो तथ्यांकले देखाएको छ। अब ४ स्थानीय तहमा मात्र बैंकका शाखा पुग्न बाँकि रहेको छ ।

राष्ट्र बैंकको तथ्याङक अनुसार हालसम्म शाखा पुग्न नसकेका स्थानीय तहमा ताप्लेजुङ जिल्लाको मिक्वाखोला, धादिङको रुवी भ्याली, जाजरकोटको जुनीचाँदे र बझाङको काँडा रहेको जनाएको छ ।

राष्ट्र बैंकबाट इजाजतप्राप्त बैंक तथा वित्तीय संस्थाहरुको संख्या २०७७ मंसिरमसान्तमा १४४ कायम भएको छ । यस अनुसार २७ वाणिज्य बैंक, १९ विकास बैंक, २१ वित्त कम्पनी, ७६ लघुवित्त वित्तीय संस्था र १ पूर्वाधार विकास बैंक संचालनमा रहेका छन्। बैंक तथा वित्तीय संस्थाहरुको शाखा संख्या २०७७ असार मसान्तमा ९७६५ रहेकोमा २०७७ मंसिरमसान्तमा १००८६ पुगेको राष्ट्र बैंकको तथ्याङकले देखाएको छ ।