साताको शेयरबजारः २२ अर्ब ७४ करोड रुपैयाँको कारोबार

३ माघ, काठमाडौं । यो साता ४ दिन खुलेको बजारमा २२ अर्ब ७४ करोड रुपैयाँ बराबरको शेयर कारोबार भएको छ । समग्रमा हेर्दा यस साताको शेयरबजार पनि उत्साहपूर्वक रहेको छ । साताभर ४ दिन खुलेको बजारमा नेप्सेले एक पछि अर्को गर्दै नयाँ नयाँ उचाइ कायम गरेको हो।

नेप्सेका अनुसार यस साता शेयर कारोबार मापक नेप्से परिसूचक ९२.०६ अंकले बढेर २२८६.५४ विन्दुको एतिहासिक उचाइमा पुगेको छ । नेप्से ४.२० प्रतिशतले बढेको हो । यस्तै, यस साता सेन्सेटिभ परिसूचक पनि १४.०३ अंकले बढेर ४३५.२५ मा पुगेको छ ।

यसैगरी, यस साता कुल २ लाख १ हजार पटकको कारोबारमा २२ अर्ब ७४ करोड रुपैयाँ बराबरको ५ करोड ५४ लाख कित्ता शेयर खरिदबिक्री भएको छ । स्टकका अनुसार कारोबार भएका कूल १२ उपसमूहमध्ये सबै वटा उपसमूहका परिसूचक बढेका छन् ।

त्यसैगरी, यस साता सबैभन्दा धेरै कर्पोरेट डेभलपमेन्ट बैंक लिमिटेडका लगानीकर्ताहरूले ४५.७३ प्रतिशतका दरले कमाएका छन् भने नारायणी डेभलपमेन्ट बैंक लिमिटेडको शेयरमूल्य सबैभन्दा बढी १९.१५ प्रतिशतले घटेको छ ।

त्यस्तै, यस साता नेप्सेमा दुई वाणिज्य बैंकले बोनस शेयर सूचिकृत गरेका छन् । यस साता नेप्सेमा कुमारी बैंक लिमिटेडको एक करोड ३५ लाख ८४ हजार २ सय ५३ दशमलव ६७ कित्ता बोनस सेयर सूचिकृत भएको हो । त्यसैगरी, एनआइसी एशिया बैंक लिमिटेडको १ करोड ८४ लाख ६३ हजार ५ सय ३७ दशमलव ९८ कित्ता बोनस सेयर सूचिकृत भएको छ ।