सिंगटी हाइड्रो इनर्जीको साढे १४ लाख कित्ता आईपीओ बिक्रीमा

४ माघ, काठमाडौं । सिंगटी हाइड्रो इनर्जी कम्पनी लिमिटेडले आज (माघ ४ गते, आइतबार)देखि आयोजना प्रभावित स्थानियहरूका लागि आइपिओ निष्कासन गर्ने भएको छ ।

कम्पनीले पहिलो चरणमा आयोजना प्रभावित क्षेत्रका स्थानीयका लागि प्रतिकित्ता १०० रुपैयाँ अंकित दरमा १४ करोड ५० लाख रुपैयाँ बराबरको १४ लाख ५० हजार कित्ता आइपिओ निष्कासन तथा बिक्री खुल्ला गर्न लागेको हो ।

पहिलो चरणमा आईपीओ बाँडफाँड पश्चात कम्पनीले दोश्रो चरणमा सर्वसाधारणका लागि शेयर निष्कासन गर्नेछ । कम्पनीले दोस्रो चरणमा २९ करोड रूपैयाँ बराबरको २९ लाख कित्ता आइपिओ निष्कासन गर्नेछ ।

हाइड्रो कम्पनीले ४३ करोड ५० लाख रूपैयाँ बराबरको ४३ लाख ५० हजार कित्ता आईपीओ निष्कासन गर्न पुस २१ गते, मंगलबार अनुमति पाएको थियो । कम्पनीको उक्त साधारण शेयर सार्वजनिक गर्न निष्कासन तथा बिक्री प्रबन्धक मेगा क्यापिटल मार्केट लिमिटेडले रहेको छ ।

कम्पनीले निष्काशन गर्न लागेको आइपीओमा स्थानीयले छिटोमा माघ १८ गतेसम्म आवेदन दिन सक्नेछन् भने सो अवधिमा सबै शेयर बिक्री नभए ढिलोमा फागुन ३ गतेसम्म आवेदन दिन पाइने व्यवस्था छ।

आइपीओमा स्थानिय बासिन्दाले न्युनतम १० कित्तादेखि २ लाख कित्तासम्मको लागि आवेदन दिन सक्नेछन्।

सार्वजनिक निष्काशन गर्नका लागि गराइएको क्रेडिट रेटिङ्गमा केयर रेटिङ्ग नेपालले कम्पनीलाई केयर एनपी डबल बी माइनस (आइएस) रेटिङ्ग प्रदान गरेको छ। यसले समयमा नै वित्तीय दायित्व पुरा गर्ने सम्बन्धमा मध्यम रुपमा सुरक्षित रहेको संकेत गर्दछ।