म तानाशाह हैन: ओली

११ माघ, काठमाडौं । प्रधानमन्त्री केपी ओलीले आफू तानाशाह हैन् बरु लोकतन्त्रको पहरेदार भएको दाबी गरेका छन् ।  आज राजधानीमा आयोजित अपांगता भएका व्यक्तिको समस्या र सवाल विषयक अन्तरक्रियामा कार्यक्रममा बोल्दै ओलीले भने, मैले शक्ति आफ्नो हातमा लिएको भए पो तानाशाह हो, बरु बैशाखमा नयाँ जनादेश लिएर आउन जनताको नासो फर्काउने निर्णय गर्नु लोकतन्त्रको सुन्दर पक्ष हो भनेका छन् ।

एकपटक सांसद चुनिएपछि सधैंको लागि जागीर खान पाउनुपर्छ भन्ने सोच राख्नु गलत भएको उनको ठहर छ । बहुमतको सरकार चलाउन नदिने प्रपञ्च रचिएकाले आफूले जनसमक्ष गएर ताजा जनमत ल्याउने विकल्प रोजेको ओलीको भनाई थियो । संसद विघटन भयो भनेर कराउनेहरु लोकतन्त्र विरोधी मात्र हुन सक्ने उनको ठम्याई रह्यो ।