केन्द्रीय समिति बैठकअघि पौडेलले बोलाए गुटको भेला

१२ माघ, काठमाडौं । नेपाली कांग्रेसका वरिष्ठ नेता रामचन्द्र पौडेलले भोलि बस्‍ने केन्द्रीय समिति बैठकका विषयमा छलफल गर्न छुट्टै भेला बोलाएका छन् । प्रतिनिधि सभा विघटन, सभापति शेरबहादुर देउवाको लाइन र केन्द्रीय समिति बैठकका एजेन्डाका विषयमा छलफल गर्न पौडेलले आफ्नै निवास बोहराटारमा छुट्टै भेला बोलाएका हुन् ।

भेलामा पौडेल निकट कांग्रेस केन्द्रीय समितिका नेताहरुलाई बोलाइएको छ । पौडेलका स्वकीय सचिव चिरञ्जीवी अधिकारीका अनुसार प्रतिनिधि सभा विघटनका विषयमा केन्द्रीय समिति बैठकमा उठाउने एजेन्डाका विषयमा वरिष्ठ नेता पौडेलले साझा धारणा बनाउन आफू निकट नेताहरुसँग परामर्श गर्न लागेका हुन् ।

प्रतिनिधि सभा विघटनविरुद्ध कांग्रेसले सडक आन्दोलन थाले पनि पुनःस्थापना शब्द उच्चारण गरेको छैन् । प्रतिनिधि सभा विघटन गर्ने प्रधानमन्त्री केपी शर्मा ओलीको निर्णयलाई कांग्रेसले अलोकतान्त्रिक र असंवैधानिक भने पनि पुनःस्थापनाको माग उठाएको छैन ।

प्रधानमन्त्री ओलीप्रति नरम रहेर भित्रभित्रै चुनावमा जाने सभापति शेरबहादुर देउवाको लाइनमा वरिष्ठ नेता पौडेल पक्ष असन्तुष्ट छ ।