आँधीखोला दोहोरीमा काम गर्ने नै लुटपाटमा संलग्न, पक्राउ पर्नेबाट कारदेखि सुनसम्म बरामद

१३ माघ, काठमाडौं । सुनका गरगहना समेतका धनमाल लुटपाटमा संलग्न रहेको अभियोगमा २ जनालाई सोमबार दिउँसो महानगरीय प्रहरी वृत्त कालीमाटीको टोलीले पक्राउ गरेको छ ।

पक्राउ पर्नेहरूमा काठमाडौं दरबारमार्गस्थित आँधीखोला दोहोरी साँझमा काम गर्ने बझाङ जयपृथ्वी नगरपालिका-१ घर भई काठमाडौं नयाँबानेश्वर बस्ने २१ वर्षीय सुनिलबहादुर सिंह र सोही दोहोरी साँझमा चालकको काम गर्ने सिन्धुपाल्चोक साँगा चोकगढी घर भई हाल काठमाडौं कोटेश्वर बस्ने ३४ वर्षीय कृष्णबहादुर श्रेष्ठ रहेका छन् ।

काठमाडौं स्युचाटार बस्ने ४२ वर्षीय पुरुषको माघ १० गते राति धनमाल लुटपाट भएको घटनाको अनुसन्धानको क्रममा घटनामा संलग्न उनीहरुलाई प्रहरीले पक्राउ गरेको कालीमाटी वृत्तका प्रमुख डीएसपी अपिल बोहोराले जनाएका छन् ।

उनीहरुबाट करिब सवा ३ तोलाको १ थान सुनको सिक्री, करिब २ तोलाको १ थान सुनको औठी, हात्तीको पुच्छर भएको करिब साढे १ तोलाको १ थान सुनको ब्रासलेट र उक्त दोहोरी साँझको बा.३ च ६६४९ नम्बरको मारुती कार पनि प्रहरीले बरामद गरेको छ । उक्त कार प्रहरीले खोजी गर्दै जाँदा कोटेश्वरको बालकुमारीस्थित ग्यारेजमा फेला परेका थियो ।

डा«इभरको काम गर्ने श्रेष्ठकी श्रीमतिबाट आइफोनसमेत फेला परेको डीएसपी बाहोराले बताएका छन् । यस सम्बन्धमा प्रहरीले थप अनुसन्धान गरिरहेको डीएसपी बोहोराले जनाएका छन् ।