१० महिना बित्दा पनि जसपाको पार्टी एकीकरण अन्योलमा

१६ माघ काठमाडौं । तत्कालीन समाजवादी पार्टी नेपाल र राष्ट्रिय जनता पार्टी (राजपा) नेपालबीच एकीकरण भइ जनता समाजवादी पार्टी (जसपा) नेपाल गठन भएको १० महिनाभन्दा बढी भइसक्यो । तर आन्तरिक विवादका कारण समायोजन प्रकृयाले अझै गति लिन नसक्दा सो पार्टी सिंगो राजनीतिक दलका रुपमा नभएर गुटगत समूहका रुपमा सीमित देखिन्छ ।

पार्टीभित्र गुटगत भेला, अन्तरक्रियालगायतका गतिविधिहरु तीव्र रुपमा भइरहेको छ । समायोजन प्रक्रियालाई गति दिनुभन्दा पनि नेताहरु तत्कालीन समाजवादी पार्टी र राजपा नेपालकै परिधिभित्र रहेर आ–आफ्नो गुट कसरी बलियो बनाउने, समायोजनामा आफ्ना मान्छे कसरी बढी पार्नेजस्ता गतिविधिमा सक्रिय देखिन्छन् ।

तत्कालीन समाजवादी पार्टीको युवा संगठनले समायोजन प्रक्रियालाई ध्यानमा राख्दै सातवटै प्रदेशमा आफ्नो अन्तरक्रिया तथा प्रशिक्षण कार्यक्रम सम्पन्न गरिसकेको छ । तर उसका कार्यक्रममा तत्कालीन राजपा नेपाल पक्षका नेताहरुको उपस्थिति रहेनन् ।

यसखालको सम्मेलन जिल्ला तथा गाउँहरुमा पनि भइरहेका हुन्छन् । राजपा पक्षधरले गरेको कार्यक्रममा समाजवादी पार्टीका नेताहरु अनुपस्थित हुने र समाजवादी पार्टीले गरेको कार्यक्रममा राजपा पक्षधरहरु अनुपस्थित हुने परम्पराजस्तै भइसकेको छ । यहाँसम्म कि जिल्ला तथा केन्द्रमा हुने पार्टी प्रवेश कार्यक्रम पनि छुट्टाछुट्टै गरिन्छ ।

केन्द्रीय कमिटीको बैठकले मंसिर मसान्तसम्म समायोजनका सम्पूर्ण कार्य सम्पन्न गर्ने निर्णय गरेको थियो । तर माघको आधासमय बितिसक्दा पनि समायोजनले गति लिएको छैन् ।