श्री ५ को सरकार भन्ने मन्त्री थापाले मागे माफी

१८ माघ, काठमाडाैं । प्रधानमन्त्री केपी ओलीले संविधानमा व्यवस्था नै नरहेको प्रतिनिधिसभा भंग गरेपछि प्रतिगमनतर्फ अग्रसर भएको आरोप लागिरहेकै बेला उनका क्याबिनेट मन्त्रीले नेपाल सरकारको ठाउँमा श्री ५ को सरकार भने । लगभग १५ वर्ष यता श्री ५ को सरकार भन्ने शव्दावलीको प्रयोग हुन छाडेको । फेरि यसअघि कहिल्यै सरकारी पदमा नरहेका ती मन्त्रीले नियतवश त्यो शव्दावलीको प्रयोग गरे वा झुक्किए ? प्रश्न गम्भिर भएपनि रमाइलो छ ।

ओली सरकारमा खानेपानी मन्त्री बनाइएका मणि थापाले हिजो सुर्खेतमा आयोजित एउटा सार्वजनिक कार्यक्रममा यस्तो भनेका थिए । उनले त्यहाँ यसो भनेका थिए–आदरणीय जनसमुदायहरु, म सबैलाई नेकपा स्थायी कमिटीका तर्फबाट र श्री ५ को सरकारको तर्फबाट…… ए ए सरी, नेपाल सरकारको तर्फबाट लालसलाम भन्न चाहन्छु ।

मन्त्री थापा झुक्किएर यस्तो शव्द निकाल्ने अवस्थाका नेता हाइनन् । किन यो कुरा आयो भन्दा कतिपयले नियोजित रुपमै यस्तो भन्न लगाइएको आरोप लगाएका छन् । मन्त्री थापाको भनाईले हिजो दिनभरि सामाजिक सञ्जालका भित्ता रंगिएका थिए । आज बिहानै मन्त्री थापाले सामाजिक सञ्जाल फेसबुकमै फेरि क्षमायाचना गरेका छन् । फेसबुक वालमा उनले लेखेका छन्– शनिबार नेपाल कम्युनिष्ट पार्टीले आयोजना गरेको कार्यकर्ता भेलालाई संवोधन गर्ने क्रममा नेपाल सरकार भन्नुपर्नेमा भुलबश अन्यथा भएकाले त्यसलाई मैले तत्कालै सच्याएको यहाँहरु जानकार नै हुनुहुन्छ ।

आम नेपाली नागरिक, मेरा शुुभचिन्तक र नेपाल कम्युनिष्ट पार्टीका नेता कार्यकर्तामा त्यसबारे कुनै द्विविधा नराखिदिनुहुन अनुरोध गर्दछु । मेरो पूरै राजनीतिक जीवन क्रान्ति र परिवर्तनमा विताएको र पश्चगमनका पक्षमा मेरो साथ नुहने कुरा विनम्रताका साथ यहाँ अनुरोध गर्दछु ।

भुलवश ती शव्द प्रयोग हुन गएकोमा क्षमा चाहन्छु । मन्त्री थापाले तत्कालै सच्याइ सकेको सन्दर्भ र विषयलाई लिएर आज यति लामो स्टाटस राख्नुका पछाडि पनि कुनै कारण हुनसक्ने अनुमान राजनीतिक वृत्तमा गरिएको छ ।