ओलीका दिन गएः डा. रिजाल

१८ माघ, काठमाडौं । नेपाली कांग्रेसका नेता डा. मिनेन्द्र रिजालले अब प्रधानमन्त्री केपी ओलीका दिन सकिएको घोषणा गरेका छन् ।बुटवलमा आज पत्रकारहरुसँग कुरा गर्दै नेता डा. रिजालले भने–सत्तामा आएपछि ओली नवसामन्त र राजाजस्तो बनेकाले जनता सडकमा ओर्लिएका छन्, अब धेरै दिन उनी सत्तामा बस्ने दिन छैन ।

सत्तामा आएपछि नियमकानून नमान्ने सर्वसत्तावादी सोच उनमा देखिएको भन्दै डा. रिजालले ओलीको हालत पूर्व राजा ज्ञानेन्द्रकै जस्तो हुने ठोकुवा गरे । जनमतको कदर नगर्नेहरू लामो समय सत्तामा टिकेको इतिहास छैन, त्यसैले ओलीको नियति पनि उही हो – उनले भने ।

ओलीजीले निर्वाचन गराउनका लागि मिति घोषणा गरेको नभई सत्ता टिकाउने चालबाजी मात्रै भएको आरोप उनले लगाए । प्रतिनिधिसभा विघटन गरेपछि न रहे बाँस , नरहे बाँसुरी जस्तो भएको टिप्पणी गर्दै उनले भने – सत्तामा टिक्ने दाउपेच मात्रै हो । सर्वाेच्च अदालतमा जारी सुनुवाईले प्रतिनिधिसभा पुनस्थापना गरी देशलाई सही दिशातर्फ उन्मुख गराउने विश्वास समेत उनले व्यक्त गरे ।