आजदेखि १२ औं रिटसम्मको बहस सकियाे

१८ माघ, काठमाडौं । प्रतिनिधिसभा विघटनविरुद्धको रिटमा सरकारी पक्षको बहस सोमबारदेखि सुरु हुने भएको छ । सर्वोच्च अदालतमा दायर १३ वटै रिटमाथि सरकारका तर्फबाट भोलीदेखि बहस हुने भएको हो ।

प्रतिनिधिसभा विघटनविरुद्ध दायर १३ वटा रिट निवेदनमाथि सुनुवाई भइरहेको संवैधानिक इजलासमा आइतबार नवौंदेखि १२ औं रिटसम्मको बहस सकिएको छ । नवौं रिटमाथि रिट निवेदकसमेत रहेका अधिवक्ताद्वय अमिता गौतम र कीर्तिनाथ शर्मा पौडेलले आइतबार बहस गरेका थिए ।

यस्तै, दशौं रिट निवेदक अधिवक्ता लोकेन्द्रबहादुर ओली, एघारौं रिटका निवेदक कलमबहादुर खत्री र बाह्रौं रिटका निवेदक मणिराम उपाध्यायले आइतबार नै बहस सकेका छन् । बाह्रौं रिटमाथिको बहस सकेर खाजा समयका लागि ‘ब्रेक’ लिएको इजलासमा ब्रेकलगत्तै तेह्रौं रिट निवेदनमाथि बहस हुनेछ ।