स्व पिताको स्मृतिमा जग्गादान

१९ माघ,महोत्तरी । महोत्तरीको भङ्गाहा नगरपालिका–३ का दुई दाजुभाईले स्व पिताको स्मृति चीरस्थायी राख्न स्वास्थ्यचौकी र नगर वडा भवन निर्माणका लागि पाँच कट्ठा जग्गा दान गरेका छन् ।

आफ्ना स्व पिता महेश्वर साहको स्मृतिमा देवेन्द्र साह र रामनरेश साहले भङ्गाहा–३ मा स्वास्थ्यचौकी र वडा कार्यालय भवन निर्माणका लागि रु २५ लाख मूल्य पर्ने पाँच कट्ठा जग्गा भङ्गाहा नगरपालिकालाई निःशुल्क उपलब्ध गराएका हुन ।

जग्गाकै अभावमा स्वास्थ्यचौकी र वडा कार्यालय भवन निर्माणको काम अघि बढ्न नसकेको बेला साह दाजुभाइले जग्गा दान गरेका हुन । अतिविपन्न मुसहर, बाँतर, खत्वे र मुस्लिम जाति समुदायको सघन बसोबास रहेको आफ्नो ठाउँमा स्वास्थ्य सेवाको पहुँच बढ्ने आशले जग्गादान गरिएको देवेन्द्र साहले बताएका छन् ।

त्यसैगरी नगरको वडा कार्यालय पनि सोही दान गरिएको कित्ताभित्र कै जग्गामा निर्माण गरिने भङ्गाहा नगरपालिकाले जनाएको छ । दुवै भवन निर्माण कार्यको शिलान्यास भइसकेको र एक वर्षभित्र सम्पन्न हुने नगरप्रमुख सञ्जीवकुमार साहले बताएका छन् ।