हुम्ला शाखाको पाँचौँ साधरणसभा सम्पन्न

२१ माघ, सिमकोट । नेपाल पत्रकार महासंघ हुम्ला शाखाको पाँचौँ साधरणसभा मंगलबार सम्पन्न भएको छ । पत्रकार शाखाका वरिष्ठ उपाध्यक्ष मधु बस्नेत शाहीको अध्यक्षतामा भएको सो साधारणसभामा महासंघका केन्द्रीय सचिव लक्ष्मी पुन र सामानुपातिक उपाध्यक्ष मिमसिंह नेपालीको उपस्थिति थियो । स्वर्गीय जयबहादुर रोकायाले हुम्ला शाखाको स्थापना गरेका थिए ।

सो अवसरमा खार्पुनाथ गाउँपालिकाका अध्यक्ष कर्णबहादुर रावलले पत्रकारले सहीरूपमा कलम चलाउन नसके झन् विकृति मौलाउने बताए। उनले भने, “पत्रकार कसैको पनि पक्षमा नभई सत्य, तथ्य र निष्पक्ष भएर कलम चलाउनुपर्छ । समाजमा ऐनाजस्तो पारदर्शी भएर रहन सक्नुपर्छ ।”

प्रमुख जिल्ला अधिकारी चिरञ्जीवी गिरीले समाज परिवर्तनका संवाहक पत्रकार भएका कारण जिम्मेवारीअनुसार कलम चनाउनुपर्ने बताए । महासंघ सचिव पुनले पत्रकार आफ्नो पेशाप्रति लगाव र समाजप्रति उत्तरदायी हुनुका साथै कलमप्रति इमान्दर हुन जरुरी रहेको बताए ।

सभामा वरिष्ठ उपाध्यक्ष मधु बस्नेत शाहीले साङ्गठनिक प्रतिवेदन, कोषाध्यक्ष सुरेश परियारले आर्थिक प्रतिवेदन पेश गर्नुभएको थियो । सभाले आफ्नो भवन निर्माणका लागि जग्गा खरिदको पहल गर्ने निर्णय गरेको छ ।