ओलीको अर्को असंवैधानिक कदम : नेता सिंह

२१ माघ, काठमाडौं । नेपाली कांग्रेसका नेता प्रकाशमान सिंहले असंवैधानिक रुपमा संवैधानिक निकायमा गरिएको नियुक्ती प्रधानमन्त्री केपी ओलीको अर्को असंवैधानिक कदम भएको टिप्पणी गरेका छन् ।

संसदीय सुनुवाइ समिति नै नभएका बेला संविधानको खिल्ली उडाउँदै गरिएको नियुक्तिले प्रधानमन्त्रीमा ‘म नै संविधान हूँ’ भन्ने दम्भ थप उजागर भएको पनि उनको भनाई छ ।

सामाजिक सञ्जालमार्फत नेता सिंहले प्रधानमन्त्री ओलीले कोरम नपुगेको संवैधानिक बैठकबाट गरिएको असंवैधानिक सिफारिसलाई मान्यता दिनका लागि गरिएको अर्को असंवैधानिक कदमको जति निन्दा गरे पनि कम हुने टिप्पणी गरे ।

सात दशक लामो संघर्ष र बलिदानीबाट प्राप्त उपलब्धिका रूपमा रहेको संविधान सरकार र सरकारमा रहनेहरूको असंवैधानिक कार्य र मनपरितन्त्रका कारण संकटमा परेको पनि नेता सिंहको भनाई छ । अब पनि सचेत नहुने हो भने प्रधानमन्त्री ओलीका कारण देश गम्भीर संवैधानिक र राजनीतिक दुर्घटनामा पर्ने सिंहले ठोकुवा गरेका छन् ।

साथै नेता सिंहले संविधानको रक्षा गर्न र राज्यको ढुकुटीमाथिको ब्रह्मलुट रोक्नका लागि जागरुक हुन सबैलाई आग्रह समेत गरेका छन् ।