प्रचण्ड-माधवको घोषणा, भोलि आम हड्ताल !

२१ माघ, काठमाडौं । प्रधानमन्त्री केपी ओलीले छापामार शैलीमा आज बिहानै संवैधानिक आयोगका पदाधिकारीहरुलाई शपथ गराएको विरोधमा नेकपाकाे प्रचण्ड–माधव समूहले भोलि आम हड्तालको घाेषणा गरेका छन् ।

पूर्व निर्धारित सबै विरोधका कार्यक्रमलाई थाती राख्दै यस्तो निर्णय गरिएको जानकारी उक्त समूहका प्रवक्ता नारायणकाजी श्रेष्ठले दिएका छन् । साथै, संघर्षका थप कार्यक्रम पनि आउँदैछ – उनले भने ।

प्रवक्ता श्रेष्ठका अनुसार हड्ताल घोषणा गर्न आज दिउँसो २ बजे पार्टी कार्यालय पेरिसडाँडामा आकस्मिक रूपमा पत्रकार सम्मेलन आयोजना गरिएकाे छ ।

संवैधानिक निकायहरूमा जबर्जस्ती नियुक्ति गरेको भन्दै प्रचण्ड नेपाल समूह समेत आपत्ति जनाएको हाे । संवैधानिक परिषदले सिफारिस गरेका विभिन्न संवैधानिक निकायका पदाधिकारीहरूले संसदीय सुनुवाइ बिनै आज शपथ लिएका हुन् ।