जनकपुरमा झडप हुँदा पूर्वमन्त्रीद्वय यादव र झा घाइते

२२ माघ, जनकपुर । प्रहरीको लाठीचार्जबाट जनकपुरमा नेकपाको दाहाल-नेपाल समुहका पूर्वमन्त्रीद्वय मातृका यादव र रामचन्द्र झासहित एकदर्जन नेता कार्यकर्ता घाइते भएका छन् ।

जनकपुरमा बजार बन्द गराउँदै हिँडेका उनीहरुलाई शिव चोकमा प्रहरीले हस्तक्षेप गर्दा झडप भएको छ । झडपको प्रहरीले लाठी चार्ज गर्दा यादव र झासहितका नेता कार्यकर्ताहरू घाइते भएका भएका हुन् ।

नेता झाको टाउकोमा चोट लागेको नेकपा जिल्ला सचिव दीपक यादवले जानकारी दिए । पूर्वमन्त्री यादव र नेता झासहितका घाइतेलाई उपचारका लागि प्रादेशिक अस्पताल जनकपुरमा पठाइएको छ ।

घाइते हुनेहरूमा यादव र झासहित शिवकुमार गोइत, सुरेश कापर, कारीराम यादव, प्रदीप साह, रूपेश विराजी, उमेश साह, रंजित पांडे, अपराजय मण्डल, सुभाष मण्डल, विरजु विराजी रहेका छन् । प्रहरीको गाडीमाथि आक्रमण गर्न खोज्दा झडप भएको र झडपको क्रममा प्रहरीले लाठीचार्ज गर्नुका साथै १ दर्जन राउन्ड हवाई फायर गरेको जिल्ला प्रहरी कार्यालय धनुषाले जनाएको छ ।

बजार बन्द गराउन हिँडेका दर्जनौँ प्रदर्शनकारीलाई प्रहरीले नियन्त्रणमा लिएको छ । उता महोत्तरी बर्दिबासमासमेत प्रहरीको लाठी चार्जबाट प्रर्दशनकारी घाइते भएका छन् । बर्दिवास नगरपालिका ३ का अध्यक्ष राजन ढुंगाना घाइते भएका हुन् ।