बन्दको उल्लंघन गरेको भन्दै चिया पसल तोडफोड

२२ माघ, विराटनगर । बन्दको उल्लंघन गरेको भन्दै दाहाल नेपाल समुहका कार्यकताले विराटनगरमा चिया पसलमा तोडफोड गरेका छन् । पूर्वमन्त्री एवं प्रचण्ड-नेपाल समूहका नेता शिवकुमार मण्डल नेतृत्वको समूहले उक्त चिया पसल तोडफोड गरेको हो ।

बन्दको बेला चिया पसल खोलेको भन्दै उनीहरुले विराटनगर महानगरपालिका–२ स्थित चिया पसल बिहीबार दिउँसो साढे १२ बजे तोडफोड गरेको प्रहरीले जनाएको छ ।

तोडफोडका क्रममा समोसा पकाउन तयारी अवस्थामा राखिएको तेल कराही घोप्टिँदा तातो तेलको छिट्टाले पसल सञ्चालक प्रमोद सहनीकी श्रीमती ४० वर्षीया बसन्ती सहनी र उनकी छोरी २२ वर्षीया बबिता सहनी सामान्य घाइते भएका छन् । बबिता ६ महिनाकी सुत्केरी रहेको प्रहरीले जनाएको छ ।

तोडफोडबाट पसलमा रहेको सोकेसको सिसा फुटेका छन् । बनिसकेको खानेकुरा भुइँमा फ्यालिएको छ भने बनाउन तयारी अवस्थामा राखिएका सामान पनि बन्दकर्ताको समूहले फ्यालेर नष्ट गरिदिएको प्रहरीले जनाएको छ ।