वर्तमान राजनैतिक परिस्थितिले देश सङ्कटमा परेको छ : निधि

२६ माघ,वीरगञ्ज । नेपाली कांग्रेसका उपसभापति विमलेन्द्र निधिले नेपालमा वर्तमान राजनैतिक परिस्थितिका कारण देशमा सङ्कट आएको बताएका छन् । नेपाल प्रेस युनियन पर्सा शाखाद्वारा आज आयोजित पत्रकार सम्मेलनमा नेता निधिले उक्त सङ्कट समाधानका लागि प्रतिनिधिसभा पुनस्थापना या निर्वाचनमा जानुपर्ने बताएका छन् ।

उनले पार्टीसंँग प्रतिनिधिसभा पुनःस्थापना र निर्वाचन दुई विकल्प रहेको साथै लोकतन्त्रको रक्षाका लागि दुवैलाई आत्मसात् गर्न तयार रहेको पनि बताएका छन् । सञ्चारकर्मीको एक प्रश्नका जवाफमा उपसभापति निधिले प्रतिनिधिसभा विघटनको विषय संवैधानिक या असंवैधानिक के हो भन्नेबारे अदालतले निर्णय गर्ने बताएका छन् ।

निधिले कांग्रेस मात्र नभएर नेपाली जनता र राजनीतिक दलको एउटै उद्देश्य भनेको प्रतिनिधिसभा निर्वाचन भएको जनाउँदै यसका लागि जस्तोसुकै परिस्थितिको सामना गर्न पार्टी तयार रहेको बताएका छन् ।