नवलपुरको चार निर्वाचन क्षेत्रमा ९९ योजना छनोट

२७ माघ,नवलपरासी । प्रदेश निर्वाचन क्षेत्र पूर्वाधार विकास कार्यक्रम अन्तर्गत नवलपरासी (बर्दघाट सुस्तापूर्व) नवलपुरमा ९९ योजना छनोट गरिएको छ । गण्डकी प्रदेश सरकारको निर्वाचन क्षेत्र पूर्वाधार विकास कार्यक्रम अन्तर्गत जिल्लाका चार निर्वाचन क्षेत्रमा ९९ योजना छनोट गरिएको हो ।

प्रदेशको निर्वाचन क्षेत्रमा प्रत्येक निर्वाचन क्षेत्रका लागि रु दुई करोड विनियोज हुँदै आएको छ । चार निर्वाचन क्षेत्रका लागि प्राप्त रु आठ करोड बजेटबाट ९९ योजना छनोट गरिएको हो ।

प्रदेशसभा सदस्यले नवलपुरका चार निर्वाचन क्षेत्रका लागि चालू आर्थिक वर्षको बजेटबाट ९९ योजना छनोट गरेका हुन् । प्रदेशको एउटा निर्वाचन क्षेत्रमा बढीमा २५ योजना छनोट गर्नुपर्ने प्रावधानअनुसार तीनवटा क्षेत्रमा २५÷२५ का दरले योजना छनोट गरिएको छ । नवलपुरको निर्वाचन क्षेत्र २ ९ख० मा भने २४ योजना छनोट गरिएको छ ।

छनोट गरिएका योजनामा धेरैजसो पूर्वाधार तर्फ सडकको स्तरोन्नति योजना रहेका छन् । चारवटै क्षेत्रमा सडक निर्माणका योजना धेरै रहेका छन् । यस्तै शिक्षा तर्फ विद्यालयका भवन निर्माण, पर्खाल निर्माण, कृषि तर्फ केही सिँचाइका लागि बाँध कुलो निर्माण मठ, मन्दिर निर्माणका योजना छनोट गरिएको छ ।

समाजिक सङ्घ संस्थाका भवन निर्माण र खेलकूद तर्फका योजनासमेत चालू आर्थिक वर्षको निर्वाचन क्षेत्र पूर्वाधार विकास कार्यक्रममा समेटिएको छ । चालू आर्थिक वर्षमा सडक स्तरोन्नति, शिक्षा, कृषि, खेलकूदलगायतका क्षेत्रलाई प्राथमिकता दिएर योजना छनोट गरिएको बताएको छ ।

जिल्लाका सबै क्षेत्रमा प्रायः उस्तै खालका योजना छनोट गरिएका छन् । छनोट गरिएका योजना कार्यान्वयका लागि यस वर्ष पूर्वाधार विकास कार्यालयलाई जिम्मा दिइएको छ । गत वर्षसम्म जलस्रोत तथा सिँचाइ विकास डिभिजनमार्फत प्रदेशको निर्वाचन क्षेत्र पूर्वाधार विकास कार्यक्रम कार्यान्वयन हुँदै आएकोमा यस वर्षदेखि पूर्वाधार विकास कार्यालयमार्फत काम गर्न लागिएको पूर्वाधार विकास कार्यालयले जनाएको छ ।

चालू आर्थिक वर्षभित्रनै सम्पन्न गर्ने गरी प्रत्येक योजनाको कार्यान्वयनका लागि प्राविधिकलाई जिम्मेवारी बाँडफाँड गरिएको कार्यालयले जनाएको छ ।