डोटीको रुपसकाँडामा प्याराग्लाइडिङको आकर्षण बढदो

२७ माघ,डोटी । डोटीको जोरायल गाउँपालिका–२ रुपसकाँडामा प्याराग्लाइडिङ सञ्चालन भएपछि पर्यटकको आर्कषण बढ्दै गएको छ । बुडर र रुपसकाँडाका डाँडामा प्याराग्लाइडिङ शुरु गरिएपछि आन्तरिक पर्यटक तथा प्याराग्लाइडिङ गर्नेको आकर्षण बढ्न थालेको छ ।

कैलाली, कञ्चनपुर, डडेल्धुरा, डोटीलगायतका क्षेत्रका स्थानीयवासीको रोजाइँमा प्याराग्लाइडिङ पर्न थालेपछि भीड बढ्न थालेको छतिवन पर्यटन प्रर्वद्धन तथा संरक्षण विकास समितिले जनाएको छ ।

अहिले दैनिकजसो सात÷आठजना आन्तरिक पर्यटकले दैनिक प्याराग्लाइडिङ उडान भर्ने गरेको छ । कम्तीमा पनि २० मिनेटको उडान अवधि रहेको उक्त प्याराग्लाइडिङ उडानमा बुडर, छतिवन, रुपसकाँडा, बाजीलेक तथा डडेल्धुरा जिल्लाका भित्री मधेशमा रहेका पर्यटकी क्षेत्रको अवलोकन पनि सहजै गर्न सकिने भएकाले प्याराग्लाइडिङ उडान भर्न आन्तरिक पर्यटक बढी आउन थालेका छन् ।

प्याराग्लाइडिङका लागि रु चार हजार टिकट तोकिएको छ भने रुपसकाँडामा अहिले दैनिक दुई वटा प्याराग्लाइडिङ टेण्डमबाट उडान सञ्चालन भइरहेको छ । छतिवन पर्यटन प्रर्वद्धन तथा संरक्षण विकास समिति तथा स्काइलाइन प्रालि पोखराले पर्यटकलाई प्याराग्लाइडिङ गराउँदै आएका छन् ।