जनताको आवाज नसुनिए शान्तिपूर्ण आन्दोलन विद्रोहमा परिणत हुनसक्छ : शर्मा

२८ माघ काठमाडौं । नेकपा प्रचण्ड–माधव पक्षका प्रभावशाली नेता जनार्दन शर्मा ‘प्रभाकर’ ले जनताको आवाज नसुनिए शान्तिपूर्ण आन्दोलन विद्रोहमा परिणत हुनसक्ने बताएका छन् । प्रधानमन्त्री केपी शर्मा ओलीको प्रतिनिधि सभा विघटन गर्ने कदमविरुद्ध बुधबार राजधानीमा आयोजित विरोध सभालाई सम्बोधन गर्दै शर्माले यस्तो धारणा राखेका हुन् ।

शर्माले शान्तिपूर्ण आन्दोलनबाट आफूहरुका माग नसुनिए जनता बाध्य भएर विद्रोहमा जान सक्ने बताएका छन् । त्यस्तै उनले प्रधानमन्त्री ओलीले जनताको संघर्षबाट प्राप्त उपलब्धिलाई कुर्सीसँग साटेको आरोप पनि लगाएका छन् । सडकबाट संघीयता खारेज हुन नसक्ने बताउँदै उनले प्रतिगमनविरुद्ध सबै जनता जाग्नुपर्ने बताए ।

लोकतन्त्रलाई पनि मजबुत बनाइनुपर्ने बताउदै उनले भनेका छन् ‘यो सीमित अधिकारको परिणाम हो । केपी ओली कसरी पैदा भए ? यसको समिक्षा गर्नुपर्छ । अन्यथा यो स्वीकार गरेनौँ भने फेरि महेन्द्र र ओलीहरु जन्मिन्छन्’ । उनले दलालको बीचमा नभइ जनताको बीचमा नेतृत्व हुर्कनुपर्ने पनि बताएका छन् ।