झाँक्री निवासमा नाराबाजी, दंगा प्रहरी परिचालन

२९ माघ, काठमाडौं । नेकपा प्रचण्ड–माधव समूहकी नेतृ रामकुमारी झाँक्रीले आफूलाई नियन्त्रणमा लिने हो भने पक्राउ पूर्जी लिएर आउन प्रहरीलाई आग्रह गरेकी छिन् । प्रहरीले आफूलाई सोधपुछका लागी बोलाए पनि झाँक्रीले त्यो स्वीकार गर्दै भनिन, “मलाई पक्राउ गर्न पक्राउ पूर्जी लिएर आउनु ।राजनीतिक मुद्दा हो । सडकमा लडिरहेका छौं, प्रतिवाद गर्छौं ।”

प्रधानमन्त्री केपी ओलीको दवावमा नेकपा प्रचण्ड(नेपाल पक्षकी प्रभावशाली नेतृ रामकुमारी झाँक्रीलाई पक्राउ गर्न उनको निवासमा सादा पोशाकका प्रहरी पुगेपछि नेकपाका कार्यकर्ता भेला भई नाराबाजी गरेका छन् । त्यसपछि प्रहरीले झडप हुनसक्ने भन्दै ठूलो संख्यामा दंगा प्रहरी परिचालन गरेको छ।

कार्यकर्ताहरुले “हाम्रो झाँक्री हाई हाई, केपी ओली बाइबाइ” लगायत नारा लगाउँदै प्रहरी दमन मूर्दावाद भन्दै नाराबाजी गरिरहेका छन्।

भाषणकै आधारमा नेतृ रामकुमारी झाँक्रीमाथि प्रहरीले अनुसन्धान अघि बढाएको छ । महानगरीय अपराध महाशाखाका प्रमुख एसएसपी दीपक थापाले बिहीबार आज नेपालबहस डटकमसँग कुराकानी गर्दै भने, उनलाई अनुसन्धानका लागि कार्यालय बोलाएको थियौँ तर उनी समयमै नआएपछि प्रहरीलाई सादा पोशाकमै उनको घरमा पठाएका हाैं ।

राष्ट्रपति बिद्यादेवी भण्डारीको आलोचना गरेको भाषणलाई आधार बनाएर उनीमाथि प्रहरीले अनुसन्धान थालेको हो । केही दिनअघि प्रधानमन्त्री केपी ओली समुह निकट महिला नेतृहरूले झाँक्रीविरुद्ध गृह मन्त्रालयमा दिएको निवेदनलाई अनुसन्धानको आधार बनाइएको छ ।गृह मन्त्रालयकै निर्देशनका आधारमा महाशाखाले नेतृमाथि अनुसन्धान गर्न लागेको हो ।