मलाई चिटिक्क चिमोट्न प्रिया

म चहलपहलमा छु कि रहलपहलमा ?
म सडकमा छु कि रङ्गमहलमा ?
म काँडामा छु कि फूलमा ?
म हुलमुलमा छु कि रनभुल्लमा ?
म खाटमा छु कि घाटमा ?
म शक्तिमा छु कि आशक्तिमा ?
म हराउँदै छु कि भेटिँदै छु ?
मान्छे हो कि भेडा, हल्ला ठूलै छ,
कि मलाई राजा बनाउँदै छन् ?
कि सबैको साझा बनाउँदै छन् ?
कि मैले होस गुमाएको मौकामा
सबैले मेरो बाह्र बजाउँदै छन् ?
मलाई चिटिक्क चिमोट्न प्रिया
म देखिदै छु कि छोपिदै छु ?
म लेखिदै छु कि मेटिदै छु ?