कांग्रेसले आज ७७ जिल्लामै विरोध प्रदर्शन गर्दै

३ फागुन, काठमाडौं । प्रतिनिधिसभा विघटनविरुद्ध नेपाली कांग्रेसले आज ७७ जिल्लामै विरोध प्रदर्शन गर्दैछ । कांग्रेसको यो तेस्रो चरणको अन्तिम कार्यक्रम हो । प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले ५ पुषमा गरेको प्रतिनिधिसभा विघटनविरुद्ध आन्दोलन गर्दै आएको छ ।

७७ वटै जिल्ला कार्यसमितिको नेतृत्वमा आयोजना हुने विरोध प्रदर्शन गर्न लागिएको हो । सभापति शेरबहादुर देउवाले घरघरबाट सहभागिता जनाएर प्रभावकारी रुपले सफल बनाउन आइतबार नै अपिल गरिसकेका छन् ।

विघटनलाई असंवैधानिक र अलोकतान्त्रिक भएको संस्थागत निर्णय गरेको कांग्रेसले यसअघि पुस १३ र २५, माघ ३, ८, १९ र २४ गते विरोध प्रदर्शन गरिसकेको छ ।