त्रिपुराका मुख्यमन्त्रीको अभिव्यक्तिप्रति प्रचण्ड-माधव समूहले जनायाे आपत्ति

५ फागुन, काठमाडौं । भारतीय जनता पार्टीका नेता तथा त्रिपुरा राज्यका मुख्यमन्त्री विप्लव देवले हालै नेपालका विषयमा दिएको अभिव्यक्तिप्रति नेकपा दाहाल–नेपाल समूहले आपत्ति जनाएको छ ।

प्रवक्ता नारायणकाजी श्रेष्ठले बुधबार एक विज्ञप्ति जारी गर्दै मुख्यमन्त्रीको अभिव्यक्तिप्रति आपित्त प्रकट गर्दै विरोध गरेका हुन् । संवेदनशील विषयमा गरिएको अभिव्यक्तिले दुई छिमेकी मित्र राष्ट्रहरूको सम्बन्धमा भ्रम छर्ने र नकारात्मक असर पुर्‍याउने नेकपाको ठहर छ ।

मुख्यमन्त्री देवले हालै मात्र भाजपा अध्यक्ष एवम् भारत सरकारका गृहमन्त्री अमित शाहले नेपाल लगायत देशहरुमा भाजपा बिस्तार गर्ने र सरकार बनाउने धारणा राखेको बताएका थिए ।

यस्तो अभिव्यक्तिले दुई छिमेकी मित्र राष्ट्रहरुको सम्बन्धमा भ्रम छर्ने र नकारात्मक असर पुर्‍याउने बक्तव्यमा उल्लेख गरिएको छ । भारत सरकार र अमित शाहबाट यसबारे स्पष्ट पारिनुपर्ने पनि अपेक्षा गरिएको छ ।