नासाले पठाएको अन्तरिक्ष यान मंगलग्रहमा सफल अवतरण

७ फागुन, काठमाडौं । नासाले पठाएको अन्तरिक्ष यान मंगलग्रहमा सफल अवतरण गरेको छ । ‘अमेरिकी पर्सीभीअरेन्स’ नाम दिइएको यानले शुक्रबार बिहान २ बजेर ४० मिनेटमा मंगलग्रहको सतह छोएको हो ।

यो यान नासाले अमेरिकाबाट उडाएको झण्डै सात महिनापछि मंगलग्रहमा पुगेको हो । मंगलग्रहमा यानले सफल अवतरण गरेपछि नासाका वैज्ञानिकले एक अर्कामा खुशी साटेका थिए । लामो समयपछि मंगलग्रहमा सफल अवतरण गरेको यो यानले मानिसको जीवन मंगलग्रहमा सम्भव छ या छैन् ? भन्ने बारेमा थप अनुसन्धान गर्नेछ ।

यानले मंगलग्रहको भुई छुने बित्तिकै तस्बिर पठाएको थियो । जहाँ बालुवा, ढुंगा र चट्टान देखिन्छन् । नासाले सन् १९७० देखि मंगलग्रहमा मान्छेको जीवन सम्भव छ कि छैन ? भन्ने बारेमा अनुसन्धान गरिरहेको छ ।

यसअघि यानले पठाएका तस्बिरमा माटो भिजेको देखिएपछि मंगलग्रहमा पानी रहेको तथ्य नासामा कार्यरत नेपाली वैज्ञानिक लुजेन्द्र ओझाले बाहिर ल्याएका थिए । पानी भेटिएपछि मंगलग्रहमा मान्छेको जीवनको खोजी भइरहेको छ ।