जे पनि हुन सक्छः प्रचण्ड

७ फागुन, काठमाडौं । प्रचण्ड–माधव पक्षको नेकपाको आज बसेको केन्द्रीय कमिटी बैठकले प्रधानमन्त्री केपी ओलीको छायाँमा सर्वाेच्च अदालत र निर्वाचन आयोग पर्नसक्ने अनुमान गर्दै जस्तोसुकै परिस्थिति आएपनि सामना गर्न तयार रहनुपर्ने ठहर गरेको छ ।

पार्टी कार्यालय पेरिसडाँडामा भएको बैठकमा बोल्दै अध्यक्षद्वय पुष्पकमल दाहाल ‘प्रचण्ड’ र माधवकुमार नेपालले यस्तो धारणा राखेका हुन् ।विकसित राजनीतिक घटनाक्रमको समीक्षा गर्दै अध्यक्ष प्रचण्डले भने – आगामी दिन जस्तोसुकै परिस्थितिको सामना गर्नुपर्ने हुनसक्छ तपाईंहरु तयार रहनुहोला ।

सर्वाेच्च अदालतले प्रतिनिधिसभा विघटनलाई सदर गर्ने आधार नभएको भन्दै तर सेटिङमा त्यस्तो भए विरुद्धमा आन्दोलनमा जानुपर्ने पक्षमा नेताहरु रहेको एकजना केन्द्रीय सदस्यले बताए । अदालत र आयोगबाट जस्तोसुकै निर्णय आउन सक्नेतर्फ संकेत गर्दै अध्यक्षद्वयले संघर्ष वा दिपावली दुबैका लागि तयार रहन निर्देशन दिएको स्रोतले जनाएको छ ।