वडा कार्यालय तोडफोड गर्नेलाई स्याङ्जा प्रहरीले किन कारवाही गरेन् ?

९ फागुन, स्याङ्जा । वडा कार्यालय तोडफोडको बिषयमा परेको किटानी जाहेरीमा प्रहरीले सक्रियता नदेखाएको पीडितले गुनासो गरेका छन् । कालीगण्डकी गाउँपालिका वडा नम्बर ३ को कार्यालय तोडफोड गर्ने तथा वडा अध्यक्षलाई ज्यानमार्ने धम्की विरुद्ध परेको किटानी जाहेरीमा अहिलेसम्म प्रहरीले अपराधी पक्राउ गरेर कारबाहीको दायरामा ल्याउन नसकेको सोही पीडित वडाध्यक्ष रामबहादुर आलेको गुनासो छ ।

मेरो वडा कार्यालयमा तोडफोड भएपछि म स्वयं उपस्थित भएर किटानी जाहेरी दिएको थिए तर अहिलेसम्म कुनै कारबाही प्रक्रिया अगाडि नबढेको अध्यक्ष आलेको भनाइ छ । वडा कार्यालयको सार्वजनिक सम्पति तोडफोड भएपछि म लगायत साथीहरूको उपस्थितिमा यहीँ फागुन ५ गते किटानी जाहेरी दिएका थियौं तर ती तोडफोड गर्ने ब्यक्ति उपर कुनै कारबाही भएन, आलेले भने ।

स्वास्थ्य चौकीको बिषयमा फागुन ३ गते वडामा भएको भेलामा सोही वडाका खुमबहादुर आले, इन्द्रबहादुर थापा र रेशम सिङ थापाले वडा कार्यालयका टेबुलकुर्ची तोडफोड गर्नुका साथै वडा अध्यक्ष समेतलाई ज्यान मार्ने धम्की दिएको भन्दै वडाध्यक्ष रामबहादुर आले, भगवती पाण्डे, उमबहादुर थापा, लोकबहादुर सुनुवार र फुलमाया सार्कीले फागुन ५ गते वडा प्रहरी कार्यलय वालिङ्मा सयुक्त रूपमा उजुरी दिएका थिए ।

स्याङ्जा प्रहरी प्रमुख होबिन्द्र बोगटीले भने उजुरी उपर काम भैइरहेको र अपराधिक गतिविधि गर्ने जोकोहीलाई पनि कानुन दायरामा ल्याइने बताएका छन् । उनले भने, कुनै पनि अपराधिक गतिविधि विरुद्ध स्याङ्जा प्रहरी सशक्त रूपमा लाग्छ । यो निवेदनको बिषयमा पनि काम भैरहेको उनको भनाइ छ ।