बुढानिलकण्ठमा कांग्रेस पदाधिकारी बैठक बस्दै

१२ फागुन, काठमाडौं । सर्वाेच्च अदालतले प्रतिनिधिसभा पुनस्थापना गर्ने फैसला गरेलगत्तै राजनीतिक दलहरु आन्तरिक छलफलमा व्यस्त छन् । यसैक्रममा नेकपा प्रचण्ड–माधव पक्ष र ओली पक्षले आजै स्थायी कमिटी बैठक डाकेर छलफल गरिरहेका छन् ।

प्रधानमन्त्री केपी ओली पक्षको बैठक सरकारी निवास बालुवाटारमा जारी छ भने प्रचण्ड–माधव पक्षको बैठक अहिले पार्टी मुख्यालय पेरिसडाँडामा बस्ने तयारीमा रहेको छ । यसअघि प्रचण्ड–माधवले नेपाली कांग्रेसका सभापति शेरबहादुर देउवासँग भेटेर कुराकानी गरेका छन् ।

पार्टी कामका सिलसिलामा चितवनमा रहेका नेताद्वय पुनस्थापना भएकाले आजै राजधानी फर्केका हुन् । फर्केलगत्तै उनीहरुले कांग्रेस सभापति देउवालाई उनकै निवास बुढानिलकण्ठमा गएर छलफल गरेका हुन् ।

आज संक्षिप्त छलफल भएको छ, पार्टी स्थायी कमिटीले ठोस धारणा बनाएपछि फेरि देउवालाई भेट्ने कार्यक्रम रहेको छ– प्रचण्ड निकट स्रोतले भन्यो । प्रचण्ड–माधवसँगको भेटघाटपछि कांग्रेसले पनि पार्टी बैठक बोलाउने तयारी थालेको छ । यसै प्रयोजनका लागि अहिले ३ बजे सभापतिले आफ्नै निवासमा पदाधिकारीको बैठक डाकेका छन् ।