आईपीएलअघि लयमा पाडिक्कल, १ सय ४० बलमा हिर्काए १५२ रन

१२ फागुन काठमाडौं । भारतमा जारी विजय हजारे ट्रफी एकदिवसीय क्रिकेट प्रतियोगितामा युवा ब्याट्सम्यान देवदत्त पाडिक्कलले शानदार ब्याटिङ गरेका छन् । उनले बुधबार ओडिशाविरुद्ध उत्कृष्ट ब्याटिङ गरेका हुन् ।

कर्नाटकबाट खेलिरहेका २० वर्षीय पाडिक्कलले ओडिशाविरुद्ध १ सय ४० बलमा १ सय ५२ रनको पारी खेले । त्यसक्रममा उनले १४ चौका र पाँच छक्का हिर्काए ।

पाडिक्कलले आईपीएलमा रोयल च्यालेन्जर्स बैंग्लोर (आरसीबी)बाट खेल्छन् । गत सिजनमा उनले आरसीबीका लागि उत्कृष्ट ब्याटिङ गरेका थिए ।

पाडिक्कलले डेब्यू आईपीएलमै आरसीबीका लागि १५ म्याचमा पाँच अर्धशतकको मद्दतमा ४ सय ७३ रन बनाएका थिए । आसन्न सिजनमा पनि उनी आरसीबीबाटै आईपीएल खेल्दै छन् ।

पाडिक्कलको उत्कृष्ट प्रदर्शनका कारण कर्नाटकले ओडिशालाई ३ सय ३० रनको विशाल लक्ष्य दिएको छ । उसका लागि पाडिक्कलले १५२ बाहेक कप्तान रविकुमार समर्थले ६०, कृष्णमूर्ति सिद्धार्थले ४१, अभिमन्यू मिथुनले ४० र करुण नायरले पनि २५ रनको योगदान दिए ।

बलिङमा सूर्यकान्त प्रधान, हर्षित राठोडले दुईरदुई र शान्तुन मिश्रले एक विकेट लिए । जारी प्रतियोगितामा कर्नाटकले दुई म्याच खेल्दा एकमा जित र दुई खेलमा हारको सामना गरेको छ । ओडिशालो भने दुई म्याचमै हार ब्यहोरेको छ ।