कांग्रेसले तत्काल कुनै पक्षसँग सहकार्य नगर्ने : नेता केसी

१३ फागुन, काठमाडौं । नेपाली कांग्रेसले तत्काल कुनै पक्षसँग सहकार्य नगर्ने भएकाे छ । नेकपाको विवाद अन्तिम टुंगो नलागेसम्म कसैको पक्ष वा विपक्षमा उभिन नसक्ने कांग्रेसले जनाएकाे हाे ।

बिहीबार पार्टी सभापति शेरबहादुर देउवाको निवास बुढानीलकण्ठमा बसेको पदाधिकारी र पूर्व पदाधिकारीहरुको बैठकपछि पत्रकारहरूसँग कुरा गर्दै नेता अर्जुननरसिंह केसीले  नेकपा विवादको अन्तिम टुंगो नलाग्दासम्म कुनै पक्षसँग सहकार्य नगर्ने बताएका हुन् ।

बैठकमा संसद पुनर्स्थापना भएपछि उत्पन्न राजनीतिक परिस्थितिबारे समीक्षा भएको थियो । बैठकमा सभापति देउवाले नेकपाको दुबै पक्षबाट सहकार्यको प्रस्ताव आएको भन्दै राय मागेका थिए ।

जनताले पनि प्रतिपक्षमा बस्ने म्याण्डेट दिएको भन्दै नेताहरुले सरकारमा जान हतार गर्न नहुने बताएका छन् । नेकपा विभाजन भएर सरकार बन्नै नसक्ने अवस्था आए मात्र यसबारे पार्टीमा छलफल गर्नु उपयुक्त हुने नेताहरुले राय दिएका छन् ।